પૂરમાં ડૂબેલી બેંકમાં રૂ.૫૦ કરોડનું સોનું અને દોઢ કરોડ રોકડા મળ્યા
૮ કલાકના સતત પ્રયાસ બાદ સોના-ચાંદી, રોકડા અને કિમતી સામાન અહીંથી બહાર કાઢવામાં આવ્યો : અજાણ્યા મૃતદેહોને વિવિધ જિલ્લાઓની ૨૧ હોસ્પિટલોમાં રાખવામાં આવ્યા
કાઠમંડુ,તા.૩૧: નેપાળમાં જળપ્રલય બાદ હાલ બચાવ કામગીરી ચાલી રહી છે. આ દરમિયાન નુવાકોટના ત્રિશૂલી સ્થિત કૃષિ વિકાસ બેંકની શાખામાંથી ૫૦ કરોડનું સોનું અને દોઢ કરોડ રોકડા સહિત ઘણા મહત્વના દસ્તાવેજ મળી આવ્યા છે.
પોલીસે જણાવ્યું કે, ૮ કલાકના સતત પ્રયાસ બાદ સોના-ચાંદી, રોકડા અને કિમતી સામાન અહીંથી બહાર કાઢવામાં આવ્યો હતો. આ દરમિયાન પૂર પ્રભાવિત વિસ્તારમાં સાવધાની રાખવામાં આવી હતી.
નુવાકોટના ત્રિશૂલી ખાતે આવેલી કૃષિ વિકાસ બેંકની શાખા ભોટેકોશી નદીના કિનારે આવેલી છે. ૨૬ ઑગસ્ટે આવેલા પૂરે ભારે તબાહી મચાવી હતી, જેમાં બેંકની આ શાખા પણ સંપૂર્ણપણે ડૂબી ગઈ હતી. પૂરના પ્રવાહમાં બેંકમાંથી રોકડ અને સોનું-ચાંદી તણાઈ ગયા હોવાની આશંકા સેવાઈ રહી હતી. જોકે, પૂર ઓસર્યા બાદ બચાવ કામગીરી દરમિયાન જ્યારે ટીમે બેંકમાં શોધખોળ શરૂ કરી, ત્યારે આશરે ૮ કલાકની ભારે જહેમત બાદ ૫૦ કરોડ રૂપિયાનું સોનું અને દોઢ કરોડ રૂપિયાની રોકડ રકમ મળી આવી હતી.
અધિકારીઓએ જણાવ્યું કે રિકવર કરાયેલી આ તમામ કિમતી ચીજવસ્તુઓને સુરક્ષિત સ્થળે ખસેડવામાં આવી છે. ભોટેકોશી નદીમાં આવેલા પૂરના પાણીનું સ્તર વધવાથી બેંક પરિસર તેમજ આસપાસના વિસ્તારોમાં ભારે નુકસાન થયું હતું. બેંકમાંથી આટલી મોટી માત્રામાં સોનું અને રોકડ મળી આવતાં આ બાબત ભારે ચર્ચાનો વિષય બની છે. હાલ પોલીસ અને વહીવટી તંત્રની દેખરેખ હેઠળ આ કિમતી સામાન સુરક્ષિત રાખવામાં આવ્યો છે અને અસરગ્રસ્ત વિસ્તારોમાં રાહત તેમજ બચાવ કામગીરી ચાલી રહી છે.
નેપાળના રસુવામાં આવેલા વિનાશક પૂર બાદ રાહત, શોધ અને બચાવ કામગીરી સતત ચાલુ છે. નેપાળના ગૃહ મંત્રાલયના રાષ્ટ્રીય આપત્તિ વ્યવસ્થાપન પ્રાધિકરણ (NDRRMA) ના ૩૧ ઑગસ્ટ ૨૦૨૬ના રોજ સવારે ૯ વાગ્યા સુધીના અહેવાલ મુજબ, અત્યાર સુધીમાં ૯૦૩ લોકોના મૃતદેહો મળી આવ્યા છે, જ્યારે હજુ પણ ૪,૨૪૭ લોકો લાપતા હોવાની નોંધ થઈ છે. અત્યાર સુધીમાં મળેલા મૃતદેહોમાં રસુવાથી ૨૪, નુવાકોટથી ૯૫, ધાદિગથી ૫૫, ગોરખાથી ૬૨, નવલપરાસી પૂર્વથી ૨૦૭, નવલપરાસી પﾍમિથી ૧૫૧, તનહૂંથી ૩૭ અને ચિતવનથી ૨૭૨ મૃતદેહો સામેલ છે. જેમાં ઘણા અજાણ્યા માનવ અવશેષો પણ સામેલ છે.
પ્રાધિકરણે જણાવ્યું કે અજાણ્યા મૃતદેહોને વિવિધ જિલ્લાઓની ૨૧ હોસ્પિટલોમાં રાખવામાં આવ્યા છે. મૃતદેહોની ઓળખ અને વ્યવસ્થાપનનું કાર્ય ચાલી રહ્યું છે. અસરગ્રસ્ત વિસ્તારોમાં ઈંધણની ઉપલબ્ધતા હેઠળ ૨૫ હજાર લિટર ડીઝલ, ૨૧ હજાર લિટર પેટ્રોલ અને ૧૦ હજાર લિટર વિમાન ઈંધણનો જથ્થો ઉપલબ્ધ છે. ત્રિશૂલી હાઇડ્રોપાવર સહિત ઘણી ટનલમાં ફસાયેલા મજૂરોને બહાર કાઢવાના પ્રયાસો સતત ચાલુ છે. ટનલની અંદર આશરે ૪ થી ૫ ફૂટ સુધી ભીનો કાટમાળ જમા થઈ ગયો હોવાના કારણે રેસ્ક્યુ ટીમને ભારે મુશ્કેલીઓનો સામનો કરવો પડી રહ્યો છે. રેસ્ક્યુ ટીમના એક સભ્યએ સ્થળ પર ટનલની અંદરની સ્થિતિ દર્શાવતા જણાવ્યું કે કાટમાળ અને પાણીના કારણે બચાવ અભિયાન અત્યંત પડકારજનક બન્યું છે.
(2:55 PM IST)
છેલ્લા 8 દિવસમાં સૌથી લોકપ્રિય 
