નવી દિલ્હી, તા.૨૧: સેન્ટ્રલ બોર્ડ ઓફ સેકન્ડરી એજ્યુકેશન (CBSE) ની ઓન-સ્ક્રીન માર્કિંગ (OSM) સિસ્ટમમાં ગંભીર ખામીઓ અને ગેરરીતિઓના આરોપો વચ્ચે આ મામલો હવે દેશની સર્વોચ્ચ અદાલત સુપ્રીમ કોર્ટમાં પહોંચ્યો છે. ચીફ જસ્ટિસ સૂર્યકાંતની અધ્યક્ષતાવાળી બેન્ચે શુક્રવારે આ અંગે સુનાવણી કરતા કેન્દ્ર સરકાર અને CBSE પાસેથી વિગતવાર જવાબ માંગ્યો છે. ખાસ કરીને એવા ૧.૬૮ લાખ વિદ્યાર્થીઓ માટે આ મુદ્દો ખૂબ જ સંવેદનશીલ બની ગયો છે જેમણે પુનઃમૂલ્યાંકન (Re-evaluation) માટે અરજી કરી હતી પરંતુ માત્ર એક સપ્તાહની મુદત હોવાને કારણે ઘણા વિદ્યાર્થીઓ પોતાની ફરિયાદો નોંધાવી શક્યા ન હતા.

 

કોર્ટે નોંધ્યું હતું કે ઉચ્ચ શિક્ષણ અને કોલેજ પ્રવેશ પ્રક્રિયા ચાલુ હોવાથી વિદ્યાર્થીઓના માર્ક્સ તેમની કારકિર્દી અને ભવિષ્યને સીધી અસર કરી રહ્યા છે. આ મામલે કોર્ટે કેન્દ્રને સોમવાર સુધીમાં સોગંદનામું (Affidavit) રજૂ કરવાનો આદેશ આપ્યો છે.

 

૧.૬૮ લાખ વિદ્યાર્થીઓની પુનઃમૂલ્યાંકનની માગ અને કેન્દ્રનો પક્ષ

 

સુનાવણી દરમિયાન સોલિસિટર જનરલ તુષાર મહેતાએ કોર્ટને જણાવ્યું હતું કે, પરીક્ષા અને મૂલ્યાંકન પ્રક્રિયાની તપાસ માટે એક સભ્યની વિશેષ સમિતિ બનાવવામાં આવી હતી. સમિતિની ભલામણ બાદ CBSE એ એક અઠવાડિયા માટે ફરિયાદ નિવારણ પોર્ટલ ખોલ્યું હતું, જેમાં આશરે ૧.૬૮ લાખ વિદ્યાર્થીઓએ તેમની ઉત્તરવહીઓના પુનઃમૂલ્યાંકન માટે અરજી કરી હતી.

 

અરજદારોના વકીલે દલીલ કરી હતી કે માત્ર એક અઠવાડિયાનો સમયગાળો પૂરતો નહોતો અને પોર્ટલ બંધ થયા પછી પણ હજારો વિદ્યાર્થીઓ પોતાની ઉત્તરવહીઓ કે પુનઃમૂલ્યાંકનનું પરિણામ ન મળવાની ફરિયાદો કરી રહ્યા છે. તેથી આ પોર્ટલ ફરીથી ખોલવું જોઈએ. જોકે, કેન્દ્ર સરકારે સ્પષ્ટ કર્યું કે સમયમર્યાદા લંબાવવાથી IIT અને અન્ય રાષ્ટ્રીય પ્રવેશ પરીક્ષાઓ (Entrance Exams) ના શિડ્યુલ ખોરવાઈ શકે તેમ હતા, જેને મુલતવી રાખવા વ્યવહારુ નહોતા.

 

સુપ્રીમ કોર્ટે માંગી કેટેગરી વાઈઝ યાદી

 

ન્યાયાધીશ જોયમલ્યા બાગચી અને ન્યાયાધીશ વી. મોહનાની હાજરીવાળી બેન્ચે અરજદારોને એવા વિદ્યાર્થીઓનું કેટેગરી વાઈઝ કોષ્ટક રજૂ કરવા કહ્યું છે જેમને કોર્ટના હસ્તક્ષેપની જરૂર છે. જેમાં:

 

• જેમણે અરજી કરી પણ જવાબ મળ્યો નથી.

 

• જેમને પોતાની ઉત્તરવહીઓ જ પ્રાપ્ત થઈ નથી.

 

• ઈન્ટરનેટ કે અન્ય ટેકનિકલ ખામીઓને કારણે જેઓ અરજી કરી શક્યા નથી.

 

વિદ્યાર્થીઓની કારકિર્દી દાવ પર

 

અરજદારોએ કોર્ટનું ધ્યાન દોર્યું કે ઘણા વિદ્યાર્થીઓએ કોમ્પિટિટિવ એન્ટ્રન્સ એક્ઝામ પાસ કરી લીધી છે, પરંતુ CBSE ના પરિણામમાં ગ્રેડ/માર્ક્સ ઓછા આવવાના કારણે તેઓ લઘુત્તમ પાત્રતા (Eligibility Criteria) પૂરી કરી શકતા નથી. આ મામલે હવે કેન્દ્ર સરકાર સોમવારે પોતાનું સોગંદનામું રજૂ કરશે, જેના પર આખા દેશના લાખો વિદ્યાર્થીઓ અને વાલીઓની નજર ટકેલી છે.