લખનૌ  :  ઉત્તર પ્રદેશના સંત કબીર નગર ખાતે ₹૬૮૪ કરોડથી વધુ મૂલ્યના ૨૦૧ વિકાસ પ્રકલ્પોનું લોકાર્પણ અને શિલાન્યાસ કરતી વખતે મુખ્યમંત્રી યોગી આદિત્યનાથે વિપક્ષી દળો કોંગ્રેસ અને સમાજવાદી પાર્ટી પર આકરા રાજકીય પ્રહારો કર્યા હતા. તેમણે કડક શબ્દોમાં ચેતવણી આપતા જણાવ્યું હતું કે યુવાનોના ભવિષ્ય કે ભરતી પરીક્ષાઓ સાથે ચેડા કરનારાઓ સામે સરકાર કોઈ પણ દયા દાખવશે નહીં. પેપર લીક અથવા ગેરરીતિમાં સામેલ ગુનેગારોની તમામ સંપત્તિઓ જપ્ત કરી લેવામાં આવશે અને તેમને આજીવન કેદની સજા ફટકારવામાં આવશે.

પોતાના સંબોધનમાં મુખ્યમંત્રીએ દેશમાં વધી રહેલી રોજગારી અને સ્ટાર્ટઅપ ઇકોસિસ્ટમ અંગે મહત્ત્વના આંકડા રજૂ કર્યા હતા. તેમણે ઉમેર્યું કે ૨૦૧૪ સુધી દેશમાં માત્ર ૪૭ કરોડ લોકોને જ કામ મળ્યું હતું, જ્યારે પ્રધાનમંત્રી નરેન્દ્ર મોદીના નેતૃત્વમાં હવે કુલ રોજગાર વધીને ૬૪.૩ કરોડથી વધુ થયો છે. ઉપરાંત ૨૦૧૪ પહેલા દેશમાં ૫૦૦થી ઓછા સ્ટાર્ટઅપ્સ હતા જે આજે વધીને ૨,૨૩,૦૦૦ ને પાર પહોંચ્યા છે અને યુનિકોર્નની સંખ્યા ૪ થી વધીને ૧૨૫ થઈ ગઈ છે, જે ડબલ-એન્જિન સરકારની સફળતા દર્શાવે છે.

રાહુલ ગાંધી અને અખિલેશ યાદવના નિવેદનોને હાસ્યાસ્પદ ગણાવતા મુખ્યમંત્રી યોગીએ કહ્યું કે આજના યુવાનોને કૌશલ્યવાન બનાવવાની જરૂર છે, જેના માટે આઈઆઈટી, એઈમ્સ, આઈઆઈએમ અને નવી મેડિકલ કોલેજોનું મોટું નેટવર્ક ઊભું કરવામાં આવ્યું છે. ભૂતકાળની વિપક્ષી સરકારો દરમિયાન યુવાનોની નોકરીઓ છીનવાઈ જતી હતી અને સ્વાસ્થ્ય સેવાઓની અછતને કારણે બાળકો રોગોથી પીડાતા હતા. તેમણે સ્પષ્ટ કર્યું કે રાજકારણથી ઉપર ઉઠીને યુવાનોના ઉજ્જવળ ભવિષ્ય અને રાજ્યના કૌશલ્ય વિકાસ માટે વર્તમાન સરકાર કટિબદ્ધ છે.