લખીમપુર: તા.૧૦: આસામ અને અરુણાચલ પ્રદેશની આંતર-રાજ્ય સરહદ પર વર્ષો જૂના જમીન વિવાદે સોમવારે સવારે ફરી એકવાર લોહિયાળ રૂપ ધારણ કર્યું છે. ધેમાજી જિલ્લામાં આવેલી મિંગમાંગ બસ્તી નજીક આસામની સીમામાં જમીન પચાવી પાડવાના કથિત પ્રયાસને પગલે અરુણાચલ પ્રદેશ તરફથી આવેલા બદમાશોએ અંધાધૂંધ ગોળીબાર કર્યો હતો. આ સશસ્ત્ર હુમલામાં આસામના ઓછામાં ઓછા ૮ સ્થાનિક નાગરિકો ગંભીર રીતે ઘાયલ થતાં સમગ્ર સરહદી વિસ્તારમાં ભારે સન્નાટો અને તણાવનો માહોલ સર્જાયો છે.

પોલીસ અને વરિષ્ઠ અધિકારીઓ પાસેથી મળતી વિગતો મુજબ, આસામની માલિકીની જમીન પર અરુણાચલ પ્રદેશના કેટલાક ગેરકાયદેસર દબાણકર્તાઓ દ્વારા કબ્જો કરવાનો પ્રયાસ કરવામાં આવી રહ્યો હતો. સ્થાનિક ગ્રામજનોએ આ અતિક્રમણનો સખત વિરોધ કરતાં બંને પક્ષો વચ્ચે ઉગ્ર બોલાચાલી થઈ હતી. વિવાદ વકરતાં સરહદ પારથી આવેલા અસામાજિક તત્વોએ હથિયારો નિકાળીને આસામના નિરપરાધ રહેવાસીઓને નિશાન બનાવીને સરેઆમ ગોળીઓ વરસાવવાનું શરૂ કરી દીધું હતું.

આ હિંસક ઘટનામાં ગોળી વાગવાથી દુર્ગેશ્વર પાટીર, રોહિત ડોલે, નાગરાજ ડોલે, બિગેશ્વર પાટીર, પામે પેગુ, સંજય તાયંગ, ઉત્પલ ડોલે અને જાન ડોલે નામના આઠ ગ્રામજનો ગંભીર રીતે લોહીલુહાણ થઈ ઢળી પડ્યા હતા. ફાયરિંગના અવાજથી સમગ્ર વિસ્તારમાં અફરાતફરી મચી ગઈ હતી. ઘટના બાદ સ્થાનિક લોકોની મદદથી તમામ ઘાયલોને તાત્કાલિક ગોગામુખ ગ્રામીણ હોસ્પિટલ પહોંચાડવામાં આવ્યા હતા. જોકે, તેમાંથી ૭ લોકોની સ્થિતિ અત્યંત નાજુક જણાતાં પ્રાથમિક સારવાર બાદ તેમને વધુ સારવાર અર્થે ધેમાજી સિવિલ હોસ્પિટલમાં રિફર કરવામાં આવ્યા છે.

ઘટનાની જાણ થતાં જ આસામ પોલીસનો ઉચ્ચ કાફલો ઘટનાસ્થળે દોડી ગયો હતો અને સરહદી વિસ્તારને ઘેરી લઈને ચુસ્ત બંદોબસ્ત ગોઠવી દીધો હતો. વરિષ્ઠ પોલીસ અધિકારીએ જણાવ્યું હતું કે સ્થિતિને કાબૂમાં લેવા માટે સુરક્ષા દળો તૈનાત કરી દેવાયા છે અને બંને રાજ્યોના ઉચ્ચ અધિકારીઓ વચ્ચે વાર્તાલાપ ચાલુ છે. સરહદ પર શાંતિ જાળવવા માટે વધારાની પોલીસ ટુકડીઓ મોકલીને તપાસનો ધમધમાટ શરૂ કરવામાં આવ્યો છે.