નવી દિલ્હી : સમગ્ર દેશમાં ચોમાસું હાલ પૂરજોશમાં સક્રિય થતાં હાહાકાર મચી ગયો છે. ભારતીય હવામાન વિભાગ (IMD) એ ૭ ઓગસ્ટ માટે પોતાના તાજેતરમાં જારી કરેલા બુલેટિનમાં દેશના અનેક રાજ્યો માટે ભારે વરસાદ, ભૂસ્ખલન અને વાવાઝોડા સાથે વીજળી પડવાની ગંભીર ચેતવણી જારી કરી છે. ખાસ કરીને કેરળ, કર્ણાટક અને ગોવામાં મુશળધાર વરસાદને કારણે જનજીવન અસ્તવ્યસ્ત બન્યું છે અને પૂર જેવી સ્થિતિ સર્જાઈ છે.

દિલ્હી-એનસીઆર (દિલ્હી, નોઈડા, ગાઝિયાબાદ, ગુરુગ્રામ અને ફરીદાબાદ) ના રહેવાસીઓને આગામી ૨૪ કલાક અત્યંત સાવચેત રહેવા જણાવાયું છે. દિવસભર કાળાડીબાંગ વાદળો વચ્ચે ગાજવીજ અને પવનના તેજ ફૂંકાવાની સાથે ભારે વરસાદની શક્યતા છે, જેનાથી રસ્તાઓ પર પાણી ભરાવા અને ટ્રાફિક જામ થવાની પૂરેપૂરી આશંકા છે.

કેરળ અને કર્ણાટકમાં ઓરેન્જ એલેર્ટ, ઉત્તર-મધ્ય ભારતમાં પણ મેઘરાજા ગાજશે
દક્ષિણ ભારતમાં સ્થિતિ વધુ કટોકટીપૂર્ણ છે. કેરળના વાયનાડ અને કોઝીકોડમાં અત્યંત ભારે વરસાદને કારણે ભૂસ્ખલનનું જોખમ વધી ગયું છે, જ્યારે કોચી અને બેંગલુરુમાં તેજ પવનો સાથે સાંબેલાધાર વરસાદ થવાની અપેક્ષા છે. તે જ રીતે, ઉત્તર પ્રદેશના લખનઉ, કાનપુર અને ગોરખપુર તેમજ મધ્ય પ્રદેશના ભોપાલ અને ઇન્દોરમાં મુશળધાર વરસાદથી તાપમાનમાં ઘટાડો થશે, પરંતુ નીચાણવાળા વિસ્તારોમાં જળબંબાકાર થવાનો ભય સેવાઈ રહ્યો છે.

હવામાન વિભાગે પશ્ચિમ બંગાળના કોલકાતા અને પહાડી વિસ્તાર સિલિગુડી ઉપરાંત બિહાર, ઓડિશા, મહારાષ્ટ્ર (મુંબઈ, પુણે) અને આસામના બ્રહ્મપુત્ર તટીય વિસ્તારોમાં રહેતા લોકોને પણ વિના કારણ ઘરની બહાર ન નીકળવા અને સુરક્ષિત સ્થળોએ રહેવાની આગ્રહભરી સલાહ આપી છે.