લખનૌ : ઉત્તર પ્રદેશમાં માળખાકીય સુવિધાઓના વિકાસને એક નવી ઊંચાઈ આપતા મુખ્યમંત્રી યોગી આદિત્યનાથની કેબિનેટે એક મહત્વકાંક્ષી પ્રસ્તાવને મંજૂરી આપી દીધી છે. હવે જેવર લિંક એક્સપ્રેસવેને સીધો ગંગા એક્સપ્રેસવે સાથે જોડવામાં આવશે. ₹૮,૫૮૫.૫૧ કરોડના અંદાજિત ખર્ચે તૈયાર થનાર આ ૬-લેન એક્સપ્રેસવે ૭૪.૪૬ કિલોમીટર લાંબો હશે. રાજ્યના વધતા જતા વાહનવ્યવહારને ધ્યાનમાં રાખીને તેને આગામી ૩૦ વર્ષની જરૂરિયાતો મુજબ ડિઝાઈન કરાયો છે અને ભવિષ્યમાં તેને ૮-લેન સુધી પહોળો કરી શકાશે.

નોઈડાના ભાઈપુર બ્રાહ્મણથી બુલંદશહેરના બહનપુર સુધી જોડાણ

આ નવો એક્સપ્રેસવે નોઈડાના ભાઈપુર બ્રાહ્મણથી શરૂ થઈને બુલંદશહેરના બહનપુર ગામ નજીક ગંગા એક્સપ્રેસવે સાથે જોડાશે. આ કોરિડોર બે પેકેજમાં તૈયાર કરવામાં આવશે. પ્રથમ પેકેજ ભાઈપુર બ્રાહ્મણથી બુલંદશહેરના બિચોલા ગામ સુધી અને બીજું પેકેજ બિચોલાથી બહનપુર સુધી લંબાશે. ઉત્તર પ્રદેશ એક્સપ્રેસવેઝ ઔદ્યોગિક વિકાસ સત્તામંડળ (UPEIDA) દ્વારા નિર્માણ પામનારા આ માર્ગ પર ૭ અંડરપાસ, ૧૧ નાના પુલ, ૩ મોટા પુલ, ૨ મેજર અંડરપાસ, ૧ ફ્લાયઓવર અને ૪ રેલ્વે ઓવરબ્રિજ (ROB) બનાવવામાં આવશે.

ઔદ્યોગિક વિકાસ, લોજિસ્ટિક્સ અને જેવર એરપોર્ટને સીધો ફાયદો

જેવર લિંક એક્સપ્રેસવેનું નિર્માણ ગંગા એક્સપ્રેસવેની આસપાસ વિકસાવવામાં આવી રહેલા ઈન્ડસ્ટ્રીયલ પાર્ક્સ અને લોજિસ્ટિક્સ ક્લસ્ટર્સને સીધું જોડાણ પૂરું પાડશે. આનાથી રાજ્યમાં કાર્ગો, ઈ-કોમર્સ અને નિકાસલક્ષી ઉદ્યોગોમાં રોકાણને મોટો વેગ મળશે. જેવર ઈન્ટરનેશનલ એરપોર્ટથી ગંગા એક્સપ્રેસવે થઈને પ્રયાગરાજ કે પૂર્વ યુપી જનારા મુસાફરો માટે હવે મુસાફરી અત્યંત સરળ અને ઝડપી બની જશે.

રાજ્ય મિલકત વિભાગના નિયમોમાં પણ ફેરફાર

આ જ કેબિનેટ બેઠકમાં રાજ્ય સરકારે 'ઉત્તર પ્રદેશ રાજ્ય મિલકત વિભાગ એકાઉન્ટ્સ કેડર સેવા નિયમો, ૨૦૨૬' ને પણ લીલી ઝંડી આપી છે. આ નિર્ણયથી વિભાગમાં સહાયક એકાઉન્ટન્ટ્સની કુલ ૧૨ જગ્યાઓમાંથી એન્ટ્રી-લેવલ અને પ્રમોશન-લેવલની જગ્યાઓ ૬-૬ ની સમકક્ષ સરખી કરી દેવામાં આવી છે. આ ફેરફારથી વિભાગમાં ખાલી પડેલી તમામ જગ્યાઓ ઝડપથી ભરી શકાશે અને કર્મચારીઓને સમયસર પ્રમોશનનો લાભ પણ મળશે.