કોલકાતા, તા. 16 :  પશ્ચિમ બંગાળની શાસક તૃણમૂલ કોંગ્રેસના સેકન્ડ-ઇન-કમાન્ડ અને મુખ્યમંત્રી મમતા બેનર્જીના ભત્રીજા અભિષેક બેનર્જીની કાનૂની મુશ્કેલીઓમાં સતત વધારો થઈ રહ્યો છે. ED દ્વારા કોલસા કૌભાંડ મામલે 11 કલાક સુધી સઘન પૂછપરછ કર્યા બાદ હવે પશ્ચિમ બંગાળ CIDએ પણ અભિષેક બેનર્જીને સમન્સ પાઠવીને તપાસના ઘેરામાં લીધા છે. CID દ્વારા અભિષેક બેનર્જીને ચોક્કસ કેસના સંદર્ભમાં હાજર થઈને નિવેદન નોંધાવવા માટે બોલાવવામાં આવ્યા છે. EDની લાંબી પૂછપરછ અને હવે CIDના સમન્સને કારણે અભિષેક બેનર્જી રાજકીય અને કાયદાકીય એમ બંને મોરચે ઘેરાયેલા જોવા મળી રહ્યા છે. અભિષેક બેનર્જી ડાયમંડ હાર્બર લોકસભા બેઠકના સાંસદ છે અને તૃણમૂલ કોંગ્રેસના યુવા ચહેરા તરીકે ઓળખાય છે. તેમના પર કોલસા કૌભાંડ, શિક્ષક ભરતી કૌભાંડ સહિત અનેક કેસોમાં નામ જોડાયેલું છે અને ED તથા CBI દ્વારા અગાઉ પણ તેમની પૂછપરછ કરવામાં આવી ચૂકી છે. તાજેતરમાં થયેલી 11 કલાકની પૂછપરછ દરમિયાન EDએ નાણાકીય વ્યવહારો અને સંપત્તિ સંબંધિત અનેક સવાલો કર્યા હોવાનું જાણવા મળ્યું છે. હવે CIDએ પણ તેમને પૂછપરછ માટે સમન્સ આપતા રાજ્યના રાજકીય વાતાવરણમાં નવી ચર્ચા જાગી છે. તૃણમૂલ કોંગ્રેસે આ કાર્યવાહીને રાજકીય વેરભાવનાથી પ્રેરિત ગણાવીને કેન્દ્ર સરકાર પર નિશાન સાધ્યું છે, જ્યારે ભાજપે કહ્યું છે કે કાયદો પોતાનું કામ કરી રહ્યો છે અને ભ્રષ્ટાચારમાં સંડોવાયેલા કોઈપણ વ્યક્તિને બક્ષવામાં આવશે નહીં. હવે અભિષેક બેનર્જી CID સમક્ષ ક્યારે હાજર થાય છે અને શું નિવેદન આપે છે તેના પર સૌની નજર છે કારણ કે આ કેસની આગામી કાર્યવાહી બંગાળના રાજકારણને અસર કરી શકે છે.