સંભલ, ઉત્તર પ્રદેશ, તા. 16 :  ઉત્તર પ્રદેશના સંભલ જિલ્લામાં ઓનર કિલિંગની એક ચોંકાવનારી ઘટના સામે આવી છે જ્યાં મોસેરા ભાઈ સાથે નિકાહ કરવાની જીદ પર અડી રહેલી યુવતીની તેના જ સગા ભાઈએ દેશી બનાવટની ગેરકાયદે પિસ્તોલથી ગોળી મારીને હત્યા કરી નાખી. પોલીસે તાત્કાલિક કાર્યવાહી કરીને આરોપી ભાઈની ધરપકડ કરી લીધી છે અને હત્યામાં વપરાયેલું ગેરકાયદે હથિયાર પણ કબજે કર્યું છે. પોલીસ તપાસ મુજબ યુવતી તેના મોસેરા ભાઈ સાથે લગ્ન કરવા માંગતી હતી પરંતુ પરિવાર અને સમાજ આ સંબંધની વિરુદ્ધમાં હતા. અનેક વખત સમજાવવા છતાં યુવતી પોતાની જીદ પર અડી રહી હતી જેનાથી પરિવારની ‘ઈજ્જત’ પર સવાલ ઉઠતા હોવાનું આરોપી ભાઈનું માનવું હતું. આ જ કારણસર આરોપીએ ઘરમાં રાખેલી દેશી બનાવટની પિસ્તોલથી બહેન પર ગોળી ચલાવી દીધી અને તેનું ઘટનાસ્થળે જ મોત નીપજ્યું હતું. હત્યા બાદ આરોપી ફરાર થઈ ગયો હતો પરંતુ સંભલ પોલીસે ટેકનિકલ સર્વેલન્સ અને સ્થાનિક માહિતીના આધારે થોડા જ કલાકોમાં તેને દબોચી લીધો. પૂછપરછ દરમિયાન આરોપીએ પોતાનો ગુનો કબૂલી લીધો છે અને જણાવ્યું છે કે પરિવારની આબરૂ બચાવવા માટે તેણે આ પગલું ભર્યું હતું. પોલીસે આરોપી વિરુદ્ધ ભારતીય દંડ સંહિતા અને આર્મ્સ એક્ટ હેઠળ કેસ નોંધીને કાયદેસરની કાર્યવાહી શરૂ કરી છે. આ ઘટનાએ સમગ્ર વિસ્તારમાં સનસની ફેલાવી દીધી છે અને ઓનર કિલિંગ જેવી સામાજિક કુપ્રથા પર ફરી એકવાર ચર્ચા શરૂ થઈ છે. પોલીસ અધિકારીઓએ જણાવ્યું છે કે ગેરકાયદે હથિયારોના વેચાણ અને ઉપયોગ પર કડક કાર્યવાહી કરવામાં આવશે.