ટોક્યો: ઉગતા સૂર્યના દેશ જાપાનમાં અત્યારે એક અનોખી સ્થિતિ જોવા મળી રહી છે. એક તરફ જાપાન પ્રવાસન ક્ષેત્રે નવા શિખરો સર કરી રહ્યું છે, તો બીજી તરફ ગેરકાયદેસર રીતે વસવાટ કરતા વિદેશીઓ માટે તેના દરવાજા કાયમ માટે બંધ થઈ રહ્યા છે. વર્ષ 2025માં જાપાનમાં વિદેશી પ્રવાસીઓનો આંકડો ઇતિહાસમાં પ્રથમ વખત 4.24 કરોડને પાર કરી ગયો છે, જે દર્શાવે છે કે જાપાન દુનિયાનું ફેવરિટ ટૂરિસ્ટ ડેસ્ટિનેશન બની રહ્યું છે.
ગેરકાયદે રહેનારાઓ સામે સર્જિકલ સ્ટ્રાઈક
પ્રવાસીઓની સંખ્યા વધવા છતાં, જાપાનની ઈમિગ્રેશન સર્વિસીસ એજન્સીના ડેટા મુજબ, દેશમાં ગેરકાયદેસર રીતે રોકાતા (Overstay) લોકોની સંખ્યામાં સતત બીજા વર્ષે ઘટાડો નોંધાયો છે. મે 2025થી અમલી બનેલી "શૂન્ય ગેરકાયદે વિદેશી રહેવાસી યોજના" હેઠળ સરકારે તપાસની પ્રક્રિયા અત્યંત કડક બનાવી છે. હાલમાં ઓવરસ્ટે કરનારાઓની સંખ્યા ઘટીને 68,488 થઈ ગઈ છે. અધિકારીઓએ ગત વર્ષે 18,000થી વધુ લોકો સામે કાર્યવાહી કરી હતી, જેમાંથી 73 ટકા લોકો ગેરકાયદેસર રીતે કામ કરતા ઝડપાયા હતા.
રેકોર્ડબ્રેક દેશનિકાલ અને કડક આશ્રય નિયમો
જાપાની સરકારે માત્ર કાગળ પર જ નહીં, પણ જમીની સ્તરે પણ કડક કાર્યવાહી કરી છે. 2025માં કુલ 17,352 વ્યક્તિઓને દેશનિકાલ (Deport) કરવામાં આવ્યા હતા. આશ્ચર્યજનક રીતે, સરકાર દ્વારા ખાસ એસ્કોર્ટ સાથે મોકલવામાં આવેલા દેશનિકાલના કેસોમાં 27.7 ટકાનો તોતિંગ વધારો થયો છે. વારંવાર આશ્રય (Asylum) માંગનારા અને ગુનાહિત રેકોર્ડ ધરાવતા લોકો માટે હવે કોઈ જગ્યા નથી. આશ્રય માટેની અરજીઓમાં પણ ઘટાડો થયો છે કારણ કે હવે અરજીની પ્રક્રિયા દરમિયાન કામ કરવાની કે રહેવાની પરવાનગી આપમેળે મળતી નથી.
ભારતીય અને અન્ય એશિયન પ્રવાસીઓનો દબદબો
જાપાન આવતા મુલાકાતીઓમાં સૌથી મોટો હિસ્સો દક્ષિણ કોરિયા, ચીન અને તાઇવાનનો છે. ટૂંકા ગાળાના પ્રવાસીઓની સંખ્યા 3.8 કરોડને આંબી ગઈ છે. જાપાન સરકારનું લક્ષ્ય 2030 સુધીમાં આશ્રય પ્રક્રિયાના સમયને ઘટાડીને માત્ર 6 મહિના કરવાનો અને ગેરકાયદે વસવાટને જડમૂળથી નાબૂદ કરવાનો છે. આ કડક વલણ છતાં, જાપાન પોતાની મજૂર જરૂરિયાતોને પહોંચી વળવા માટે કાયદેસરના રહેઠાણના દરજ્જા અને ટેકનિકલ તાલીમાર્થીઓ પર પણ ચાંપતી નજર રાખી રહ્યું છે. ખાસ કરીને વિયેતનામી નાગરિકોના રહેઠાણનો દરજ્જો રદ કરવાના કિસ્સા પણ વધ્યા છે.