ગુવાહાટી:  ભારતના ત્રણ રાજ્યોમાં આજે લોકશાહીનો ગરમાવો જોવા મળ્યો હતો. આસામ, કેરળ અને કેન્દ્રશાસિત પ્રદેશ પુડુચેરીમાં વિધાનસભા ચૂંટણી માટે થયેલા મતદાનમાં લોકોએ જે ઉત્સાહ બતાવ્યો છે, તેણે પાછલા તમામ રેકોર્ડ તોડી નાખ્યા છે. ખાસ કરીને આસામમાં ૨૦૨૧ ના આંકડાઓને વટાવીને મતદારોએ પરિવર્તન કે પુનરાવર્તનના મક્કમ સંકેત આપ્યા છે.

આસામ: ૨૦૨૧ નો રેકોર્ડ તૂટ્યો, દાલગાંવમાં જબરદસ્ત ૯૪% મતદાન

આસામની તમામ ૧૨૬ બેઠકો પર એક જ તબક્કામાં મતદાન યોજાયું હતું. સાંજે ૬ વાગ્યા સુધીમાં રાજ્યમાં અંદાજે ૮૫.૦૪ ટકા મતદાન નોંધાયું છે, જે ૨૦૨૧ ની ચૂંટણીના ૮૨.૦૪ ટકા કરતા ઘણું વધારે છે.

· ટોપ પર: દાલગાંવ મતવિસ્તારમાં સૌથી વધુ ૯૪.૫૭ ટકા મતદાન થયું.

· સૌથી ઓછું: અમરીમાં ૭૦.૪૦ ટકા નોંધાયું.

ભાજપની આગેવાની હેઠળની NDA અહીં ત્રીજી ટર્મ માટે લડી રહી છે, જ્યારે કોંગ્રેસ એક દાયકાના વનવાસ પછી સત્તામાં આવવા મથી રહી છે.

પુડુચેરી: ૮૯ ટકા સાથે દેશમાં મોખરે

કેન્દ્રશાસિત પ્રદેશ પુડુચેરીમાં પણ ૩૦ બેઠકો માટે લોકોએ અભૂતપૂર્વ ભાગીદારી બતાવી છે. પ્રાથમિક અંદાજ મુજબ અહીં ૮૯ ટકાથી વધુ મતદાન થયું છે. અહીં એડમિનિસ્ટ્રેટિવ પાવર અને સ્થાનિક સ્વાયત્તતાના મુદ્દે ચૂંટણી લડાઈ હતી, જેમાં જનતાએ ઉમળકાભેર ભાગ લીધો હતો.

કેરળ: કલાકો સુધી કતારોમાં ઉભા રહ્યા મતદારો

કેરળની ૧૪૦ બેઠકો પર પણ મતદાનની ગતિ તેજ રહી હતી. સાંજે ૬ વાગ્યા સુધીમાં ૭૭.૩૮ ટકા મતદાન નોંધાયું હતું. સમય મર્યાદા પૂરી થયા પછી પણ હજારો મતદારો લાઈનમાં ઉભા હોવાથી ચૂંટણી પંચ દ્વારા ટોકન આપીને મોડી રાત સુધી મતદાનની મંજૂરી આપવામાં આવી હતી. આ આંકડો પણ ૨૦૨૧ ના ૭૪.૦૬ ટકા કરતા વધારે છે.

ચૂંટણીના આંકડા એક નજરે:

આ જંગી મતદાન સ્પષ્ટપણે દર્શાવે છે કે જનતા પોતાની સરકાર પસંદ કરવા માટે કેટલી જાગૃત છે. હવે પરિણામોની રાહ જોવાઈ રહી છે, જે નક્કી કરશે કે કયા રાજ્યમાં કોની કલગીમાં યશનો તાજ સજશે.