મુંબઈ: તા.૯ માયાનગરી મુંબઈના રસ્તાઓને અતિક્રમણ મુક્ત બનાવવા માટે બૃહન્મુંબઈ મ્યુનિસિપલ કોર્પોરેશન (BMC) એ હવે આરપારની લડાઈ શરૂ કરી છે. અંધેરી-ઓશિવારાના વ્યસ્ત ગણાતા ઇન્ફિનિટી મોલની સામેના વિસ્તારમાં ગુરુવારે પાલિકાએ મોટું ઓપરેશન હાથ ધરીને ગેરકાયદે ફેરિયાઓના જાળને મૂળમાંથી ઉખેડી ફેંક્યો છે. લાંબા સમયથી ફૂટપાથ પર કબજો જમાવીને બેઠેલા તત્વો સામે જેસીબી (JCB) અને ડમ્પરોની ફોજ ઉતારીને રસ્તાઓ ખુલ્લા કરવામાં આવ્યા છે.

સોશિયલ મીડિયા પર વીડિયો વાયરલ

મુંબઈના જાણીતા ફિલ્મ નિર્માતા અશોક પંડિતે આ કાર્યવાહીનો વીડિયો પોતાના ઇન્સ્ટાગ્રામ પર શેર કરીને તંત્રની પ્રશંસા કરી છે. તેમણે જણાવ્યું કે, આ એક મુખ્ય વ્યાપારી વિસ્તાર હોવાથી અહીં ફૂટપાથ પર ફેરિયાઓનો જમાવડો રહેતો હતો, જેના કારણે ઓફિસ જનારા નાગરિકોને ચાલવું પણ મુશ્કેલ બની જતું હતું. પાલિકાના અધિકારીઓએ પોલીસના કાફલા સાથે અહીં પહોંચીને આખું મેદાન સાફ કરી દીધું છે.

નેતા પોતે રસ્તા પર ઉતર્યા

આ ઝુંબેશની સૌથી ખાસ વાત એ હતી કે, કોર્પોરેટર રૂપેશ સાવરકર પોતે આ ટીમનું નેતૃત્વ કરી રહ્યા હતા. વીડિયોમાં જોઈ શકાય છે કે અતિક્રમણ દૂર થયા બાદ રૂપેશ સાવરકર જાતે ફૂટપાથ પર પાણીનો છંટકાવ કરીને વિસ્તારને ધોઈ રહ્યા છે, જેથી રાહદારીઓ માટે સ્વચ્છ માર્ગ ઉપલબ્ધ થાય. આ દ્રશ્યો જોઈને મુંબઈગરાઓએ તંત્રના આ અનોખા અંદાજને વધાવ્યો છે.

સંઘર્ષ વચ્ચે પણ કડક વલણ

BMCની આ ઝુંબેશ માત્ર ઓશિવારા પૂરતી મર્યાદિત નથી, સમગ્ર મુંબઈમાં અત્યારે અતિક્રમણ વિરોધી પવન ફૂંકાયો છે. જોકે, આ કામગીરી એટલી સરળ પણ નથી. તાજેતરમાં જ સાંતાક્રુઝ રેલ્વે સ્ટેશન પાસે જ્યારે BMCની ટીમ કાર્યવાહી કરવા પહોંચી ત્યારે ગેરકાયદે ફેરિયાઓએ કર્મચારીઓ પર હુમલો કર્યો હતો. આ મામલે FIR પણ નોંધવામાં આવી છે. ભાજપ નેતા હેતલ ગાલાએ આ હુમલાની નિંદા કરતા સ્પષ્ટ કર્યું છે કે ડ્યુટી પરના અધિકારીઓ સામે આવી દાદાગીરી સહન કરવામાં આવશે નહીં.

નગરજનોમાં ખુશીની લહેર

વધતી જતી ભીડ અને ટ્રાફિકની સમસ્યા વચ્ચે BMCની આ સક્રિયતાથી સામાન્ય નાગરિકોને મોટી રાહત મળી છે. ખાસ કરીને રેલ્વે સ્ટેશનો અને મોટા મોલ્સની બહારનો ભાગ હવે ખુલ્લો દેખાવા લાગ્યો છે. પાલિકાના સૂત્રોના જણાવ્યા અનુસાર, જો ફેરિયાઓ ફરીથી આ જગ્યાએ કબજો કરવાનો પ્રયત્ન કરશે, તો તેમની સામે વધુ કડક દંડનીય કાર્યવાહી કરવામાં આવશે.