મુંબઈ : મુંબઈના શાંત ગણાતા ગોરાઈ બીચ પર ગત સોમવારે વહેલી સવારે કાયદો અને વ્યવસ્થાના ધજાગરા ઉડાવતી એક ઘટના સામે આવી છે. વહીવટી તંત્રની કોઈ પણ પરવાનગી વિના અહીં ગેરકાયદે ઘોડા ગાડી દોડનું આયોજન કરવામાં આવ્યું હતું. આ રેસનો વીડિયો સોશિયલ મીડિયા પર વાયરલ થતા જ ખળભળાટ મચી ગયો છે. સેંકડોની સંખ્યામાં ઉમટેલી ભીડ અને દોડતા ઘોડાઓના કારણે દરિયાકિનારો ધૂળની ડમરીઓ અને અરાજકતાનું મેદાન બની ગયો હતો.
કાર્યકરો પર હુમલો અને પોલીસ ફરિયાદ
આ ગેરકાયદેસર પ્રવૃત્તિની જાણ થતા જ પ્રાણી અધિકાર કાર્યકર્તા પલ્લવી પાટિલ પોતાની ટીમ સાથે ઘટનાસ્થળે પહોંચ્યા હતા. જ્યારે તેઓ ઘોડાઓ પ્રત્યે થઈ રહેલી ક્રૂરતાનું શૂટિંગ કરી રહ્યા હતા, ત્યારે આયોજકો અને ત્યાં હાજર ભીડ ઉશ્કેરાઈ ગઈ હતી. કાર્યકરોને વીડિયો રેકોર્ડિંગ કરતા અટકાવવા માટે ભીડ તેમની સાથે બાખડી પડી હતી અને ઉગ્ર અથડામણ થઈ હતી. આ મામલે ગોરાઈ પોલીસ સ્ટેશનમાં ફરિયાદ નોંધાવવામાં આવી છે અને પોલીસે એફઆઈઆર (FIR) દાખલ કરીને તપાસ શરૂ કરી છે.
મોટા પાયે સટ્ટાબાજીની આશંકા
પોલીસને શંકા છે કે આ રેસ માત્ર મનોરંજન માટે નહીં, પરંતુ મોટા પાયે સટ્ટાબાજી માટે યોજાઈ હતી. સ્થાનિક લોકોના જણાવ્યા મુજબ, આ દોડ પર લાખો રૂપિયાની હોડ લગાવવામાં આવી હતી. સંગઠિત ગેરકાયદેસર સિન્ડિકેટ આ સમગ્ર ખેલ પાછળ હોવાની પ્રબળ શક્યતા છે. અધિકારીઓ હવે વાયરલ વીડિયો ફૂટેજના આધારે આયોજકો અને રેસમાં ભાગ લેનારા શખ્સોને ઓળખવા માટે કવાયત કરી રહ્યા છે.
પ્રાણી ક્રૂરતા અને જાહેર સુરક્ષા
કાર્યકરોએ આક્ષેપ કર્યો છે કે આવી રેસમાં ઘોડાઓને ક્ષમતા કરતા વધુ ઝડપે દોડવા માટે મજબૂર કરવામાં આવે છે અને તેમની સાથે અત્યંત નિર્દયતાભર્યું વર્તન કરવામાં આવે છે. સલામતીના સાધનો વગર દરિયાકિનારે યોજાતી આવી રેસ સહેલાણીઓ માટે પણ જોખમી સાબિત થઈ શકે છે. પોલીસે ખાતરી આપી છે કે તપાસના અંતે જવાબદારો સામે કડક કાયદાકીય પગલાં લેવામાં આવશે.