ઇસ્લામાબાદ: પશ્ચિમ એશિયાના સંકટમાં મધ્યસ્થી તરીકે ઉભરી રહેલા પાકિસ્તાનના વડાપ્રધાન શહબાઝ શરીફ અત્યારે એક મોટી સોશિયલ મીડિયા વિવાદમાં ફસાયા છે. અમેરિકા અને ઈરાન વચ્ચે ચાલી રહેલી તંગદિલીમાં શાંતિ સ્થાપવા માટે કરવામાં આવેલી એક પોસ્ટમાં એડિટિંગની ભૂલને કારણે પાકિસ્તાનના રાજદ્વારી સંદેશાઓની વિશ્વસનીયતા પર ગંભીર સવાલો ઉઠી રહ્યા છે. આ વિવાદ એવા સમયે સર્જાયો છે જ્યારે પાકિસ્તાન સક્રિયપણે બંને દેશો વચ્ચે યુદ્ધવિરામ કરાવવા માટે પ્રયત્નશીલ છે.

શહબાઝ શરીફે સોશિયલ મીડિયા પ્લેટફોર્મ 'X' પર એક પોસ્ટ કરી હતી, જેમાં તેમણે અમેરિકી રાષ્ટ્રપતિ ડોનાલ્ડ ટ્રમ્પને ઈરાન પરની સમયમર્યાદા લંબાવવા વિનંતી કરી હતી જેથી મુત્સદ્દીગીરીને તક મળે. સાથે જ તેમણે ઈરાનને હોર્મુઝ સ્ટ્રેટ ફરી ખોલવા માટે પણ અપીલ કરી હતી. જોકે, આ પોસ્ટની એડિટ હિસ્ટ્રીએ સોશિયલ મીડિયા પર ચર્ચા જગાવી છે. ઓનલાઈન વાયરલ થયેલા સ્ક્રીનશૉટ્સ મુજબ, પોસ્ટના શરૂઆતના સંસ્કરણમાં 'Draft - Pakistan’s PM Message on X' એવું લેબલ જોવા મળ્યું હતું. આ 'ડ્રાફ્ટ' શબ્દને કારણે એવી અટકળો તેજ થઈ છે કે શું આ શાંતિ સંદેશ અગાઉથી સ્ક્રિપ્ટેડ હતો અથવા કોઈ બાહ્ય શક્તિ દ્વારા પ્રભાવિત હતો.

વિદેશી પ્રભાવના આક્ષેપો અને વિવાદ:
સોશિયલ મીડિયા યુઝર્સ આ પોસ્ટમાં વપરાયેલી અંગ્રેજી ભાષા અને ડ્રાફ્ટના ફોર્મેટ પર સવાલ ઉઠાવી રહ્યા છે. કેટલાક લોકોએ દાવો કર્યો છે કે આ સંદેશાની ભાષા પાકિસ્તાનની આંતરિક કાર્યશૈલી મુજબની નથી, જે સૂચવે છે કે આ કોઈ 'વ્હાઇટ હાઉસ સૂચના' હોઈ શકે છે. જોકે, આ આક્ષેપોની અત્યાર સુધી કોઈ સત્તાવાર પુષ્ટિ થઈ નથી કે ઇસ્લામાબાદ અથવા વોશિંગ્ટન દ્વારા કોઈ સ્પષ્ટતા કરવામાં આવી નથી. તેમ છતાં, આ વિવાદને કારણે પાકિસ્તાનની મધ્યસ્થીની ભૂમિકા પર વિરોધ પક્ષો અને વિવેચકો આંગળી ઉઠાવી રહ્યા છે.

યુદ્ધવિરામ અને મધ્યસ્થીની પ્રક્રિયા:
આ વિવાદ એવા નાજુક તબક્કે આવ્યો છે જ્યારે પાકિસ્તાન લશ્કરી વડા આસિમ મુનીર અને વડાપ્રધાન શહબાઝ શરીફ દ્વારા હાથ ધરવામાં આવેલી રાજદ્વારી મથામણને કારણે અમેરિકા અને ઈરાન ૧૪ દિવસના યુદ્ધવિરામ માટે સંમત થયા છે. ઈરાનના વિદેશ મંત્રી સૈયદ અબ્બાસ અરાઘચીએ પણ સ્વીકાર્યું છે કે પાકિસ્તાન અને અમેરિકાના સહયોગથી વાટાઘાટો ચાલુ છે. ઈરાને શરત મૂકી છે કે જો તેના પરના હુમલા બંધ થાય તો તે લશ્કરી જવાબ આપવાનું રોકી દેશે. આ ૧૪ દિવસના ગાળામાં હોર્મુઝ સ્ટ્રેટ પણ સુરક્ષિત અવરજવર માટે ખુલ્લો રાખવાની તૈયારી બતાવવામાં આવી છે, પરંતુ પાકિસ્તાનના વડાપ્રધાનની આ પોસ્ટમાં થયેલી ક્ષતિએ હાલમાં રાજદ્વારી વર્તુળોમાં ભારે ચર્ચા જગાવી છે.