નવી દિલ્હી : લોકપ્રિય રેપર બાદશાહ અત્યારે પોતાના ગીતોના કારણે નહીં, પરંતુ કાયદાકીય મુશ્કેલીઓના કારણે ચર્ચામાં છે. મંગળવારે નવી દિલ્હીમાં રાષ્ટ્રીય મહિલા આયોગ (NCW) સમક્ષ બાદશાહ હાજર થયા હતા, જ્યાં તેમના તાજેતરના હરિયાણવી ગીત 'તાતીરી' (Tattiri) માં અશ્લીલતા અને મહિલાઓના અભદ્ર પ્રદર્શન અંગે એક કલાકથી વધુ સમય સુધી આકરી પૂછપરછ કરવામાં આવી હતી. આ પૂછપરછ બાદ બાદશાહ ચુસ્ત સુરક્ષા વચ્ચે NCW ઓફિસમાંથી બહાર નીકળતા જોવા મળ્યા હતા.
શા માટે વિવાદમાં આવ્યું ગીત?
માર્ચ 2026 માં રિલીઝ થયેલા આ ગીત સામે રાષ્ટ્રીય મહિલા આયોગે સ્વતઃ સંજ્ઞાન (Sua Sponte) લીધું હતું. આયોગનું માનવું છે કે ગીતના શબ્દો અને તેમાં બતાવવામાં આવેલા દ્રશ્યો પ્રથમ દૃષ્ટિએ વાંધાજનક છે. આ સામગ્રી ભારતીય ન્યાય સંહિતા, આઈટી એક્ટ અને મહિલાઓના અભદ્ર પ્રતિનિધિત્વ (પ્રતિબંધ) અધિનિયમ, 1986 ની જોગવાઈઓનું સ્પષ્ટ ઉલ્લંઘન કરતી જણાય છે. આ મામલે બાદશાહ (આદિત્ય પ્રતીક સિંહ સિસોદિયા) ઉપરાંત ગીતના પ્રોડ્યુસર હિતેન અને ડાયરેક્ટર્સ માહી સંધુ અને જોબન સંધુને પણ તમામ પુરાવાઓ સાથે હાજર થવા આદેશ અપાયો છે.
ધરપકડનો ડર અને માફીની માંગ
આ વિવાદ એટલો વકર્યો હતો કે હરિયાણા રાજ્ય મહિલા આયોગે સમયસર હાજર ન થવા બદલ બાદશાહની ધરપકડ કરવાનો નિર્દેશ પણ જારી કર્યો હતો. સોશિયલ મીડિયા પર યુઝર્સ આ ગીતને "અત્યંત અશ્લીલ" અને "સંસ્કૃતિ વિરોધી" ગણાવી રહ્યા છે. જોકે, વધતા વિરોધને જોઈને બાદશાહે પોતાના ઈન્સ્ટાગ્રામ એકાઉન્ટ પર એક વીડિયો શેર કર્યો હતો, જેમાં તેમણે જણાવ્યું હતું કે જો કોઈની લાગણી દુભાઈ હોય તો તેઓ માફી માંગે છે.
કાયદાનો ગાળિયો કસાશે?
બાદશાહ વિરુદ્ધ અગાઉ પોલીસ ફરિયાદ પણ દાખલ થઈ ચૂકી છે. હવે મહિલા આયોગ આ મામલે વધુ તપાસ કરી રહ્યું છે કે શું ગીતમાંથી વિવાદાસ્પદ ભાગ દૂર કરવામાં આવશે કે પછી રેપર અને તેની ટીમ સામે કડક કાયદાકીય કાર્યવાહી કરવામાં આવશે. મનોરંજન જગતમાં આ ઘટનાએ ફરી એકવાર 'ક્રિએટિવ ફ્રીડમ' અને 'નૈતિકતા' વચ્ચેની ચર્ચા છેડી દીધી છે.