નવી દિલ્હી: કેન્દ્ર સરકારના લાખો કર્મચારીઓ અને પેન્શનરો માટે આગામી 13 એપ્રિલનો દિવસ અત્યંત મહત્વનો સાબિત થવા જઈ રહ્યો છે. દિલ્હીમાં જેપી ચૌબે મેમોરિયલ લાઇબ્રેરી ખાતે રાષ્ટ્રીય પરિષદ (JCM) ની ડ્રાફ્ટિંગ સમિતિની એક હાઈ-લેવલ બેઠક યોજાશે. આ બેઠકમાં 8મા પગાર પંચના અમલીકરણ માટેના 'કોમન મેમોરેન્ડમ'ને આખરી ઓપ આપવામાં આવશે. કર્મચારી સંગઠનો આશા રાખી રહ્યા છે કે આ બેઠક બાદ પગાર સુધારા, વાર્ષિક ઈન્ક્રીમેન્ટ અને ભથ્થાં અંગેની તસવીર સ્પષ્ટ થશે, જે સીધી રીતે લાખો પરિવારોના આર્થિક ભવિષ્ય સાથે જોડાયેલી છે.

આ વખતે કર્મચારીઓની સૌથી મોટી માંગ 3.15 ના ફિટમેન્ટ ફેક્ટર અને વર્તમાન 58% મોંઘવારી ભથ્થા (DA) ને મૂળ પગારમાં ભેળવી દેવાની છે. જો સરકાર આ માંગ સ્વીકારે તો કર્મચારીઓના મૂળ પગારમાં મોટો ઉછાળો આવી શકે છે. ફેડરેશન ઓફ નેશનલ પોસ્ટલ ઓર્ગેનાઇઝેશન (FNPO) સહિતના અનેક સંગઠનો આગ્રહ કરી રહ્યા છે કે નવા પગાર ધોરણોનો લાભ 1 જાન્યુઆરી, 2026 થી પૂર્વવર્તી અસરથી આપવામાં આવે. જોકે, સરકાર આ અંગે શું મધ્યમ માર્ગ કાઢે છે તેના પર સૌની નજર ટકેલી છે, કારણ કે નિષ્ણાતોના મતે સરકાર 2.5 થી વધુ ફિટમેન્ટ ફેક્ટર પર મહોર મારી શકે છે.

ચૂંટણીના માહોલ વચ્ચે આ બેઠક રાજકીય રીતે પણ ખૂબ જ સૂચક માનવામાં આવે છે. નાણા રાજ્યમંત્રી પંકજ ચૌધરીએ અગાઉ સંસદમાં સ્પષ્ટ કર્યું હતું કે 8મું પગાર પંચ નવેમ્બર 2025 થી કાર્યરત થઈ ગયું છે અને તે 18 મહિનાની અંદર પોતાનો રિપોર્ટ સબમિટ કરશે. એટલે કે, આગામી એક વર્ષની અંદર પગાર વધારાનો સત્તાવાર આદેશ આવી શકે છે. 13 એપ્રિલની આ બેઠક સરકાર અને કર્મચારી સંગઠનો વચ્ચે સેતુ બનીને પગાર પંચની ભલામણોને વેગ આપવાનું કામ કરશે, જેનાથી સરકારી કર્મચારીઓમાં નવી આશાનો સંચાર થયો છે.