નવી દિલ્હી: દેશના સૌથી ચર્ચિત ગણાતા ઠગ સુકેશ ચંદ્રશેખરને દિલ્હીની એક અદાલતે મની લોન્ડરિંગના એક કેસમાં મોટી રાહત આપી છે. AIADMK ના "બે પાંદડા" ચૂંટણી પ્રતીક મેળવવા માટે લાંચ આપવાના અને મની લોન્ડરિંગના આરોપ હેઠળ લાંબા સમયથી જેલમાં બંધ સુકેશને કોર્ટે જામીન પર મુક્ત કરવાનો આદેશ આપ્યો છે. જોકે, અન્ય કેસો પેન્ડિંગ હોવાથી તે હાલ જેલના સળિયા પાછળ જ રહેશે, પરંતુ આ ચુકાદો કાયદાકીય દ્રષ્ટિએ અત્યંત મહત્વનો માનવામાં આવે છે.
સ્વતંત્રતા એ બંધારણીય મૂલ્ય છે
ખાસ ન્યાયાધીશ વિશાલ ગોગને સુકેશની જામીન અરજી મંજૂર કરતા લોકશાહી અને બંધારણના મૂલ્યો પર ભાર મૂક્યો હતો. કોર્ટે અવલોકન કર્યું કે, "સ્વતંત્રતા એ આપણા બંધારણનું સૌથી પવિત્ર ધોરણ છે. માત્ર આર્થિક ગુનો છે એવા ડરથી રાજ્ય (સરકાર) કોઈની વ્યક્તિગત આઝાદીને અપ્રમાણસર રીતે છીનવી શકે નહીં." કોર્ટે સ્પષ્ટ કર્યું કે પ્રિવેન્શન ઓફ મની લોન્ડરિંગ એક્ટ (PMLA) હેઠળ ગુનાની ગંભીરતા હોવા છતાં, તેનો ઉપયોગ આરોપીને તેના જામીનના અધિકારથી વંચિત રાખવા માટે હથિયાર તરીકે ન થઈ શકે.
ટ્રાયલ વિના લાંબો જેલવાસ અયોગ્ય
કોર્ટે નોંધ્યું હતું કે સુકેશ ચંદ્રશેખર સામે અનેક કેસો ચાલી રહ્યા છે, પરંતુ આ ચોક્કસ બાબતમાં તેને વધુ સમય સુધી અટકાયતમાં રાખવો યોગ્ય નથી. ન્યાયાધીશે ટાંક્યું કે પીએમએલએ હેઠળના કેસોમાં કાર્યવાહી વર્ષો સુધી સ્થગિત રહે છે, જેના કારણે આરોપીએ ટ્રાયલ શરૂ થયા વિના જ લાંબો સમય જેલમાં વિતાવવો પડે છે. કોર્ટના મતે, આ આરોપીના 'ઝડપી ટ્રાયલ' મેળવવાના અધિકારનું ઉલ્લંઘન છે.
જામીનની શરતો
કોર્ટે સુકેશને વ્યક્તિગત બોન્ડ અને 5 લાખ રૂપિયાના જામીન બોન્ડ પર મુક્ત કરવાનો નિર્દેશ આપ્યો છે. સુકેશે તેની સામેના મોટાભાગના કેસોમાં જામીન મેળવી લીધા છે, પરંતુ હજુ પણ અમુક કેસોમાં તેની અટકાયત યથાવત હોવાથી તેને જેલમાંથી બહાર આવવા માટે થોડી વધુ રાહ જોવી પડી શકે છે.
આ ચુકાદો એવા સમયે આવ્યો છે જ્યારે તપાસ એજન્સીઓ દ્વારા PMLA હેઠળ કરવામાં આવતી ધરપકડો અને જામીન મળવામાં થતા વિલંબ અંગે દેશભરમાં ચર્ચાઓ ચાલી રહી છે. દિલ્હી કોર્ટનું આ વલણ આવનારા સમયમાં અન્ય આર્થિક ગુનાઓના કેસો માટે પણ માર્ગદર્શક બની શકે છે. વધુ વિગતો માટે જોડાયેલા રહો.