જેરુસલેમ: ખાર્ગ આઈલેન્ડ પર અમેરિકી હુમલા બાદ હવે ઈઝરાયેલે પણ ઈરાન વિરુદ્ધ આક્રમક મોરચો ખોલી દીધો છે. ઈઝરાયેલી સેનાએ ઈરાનના અનેક વ્યૂહાત્મક રેલવે બ્રિજ અને હાઈવે પુલ પર ભીષણ હવાઈ હુમલા કર્યા છે. આ હુમલામાં અત્યાર સુધીમાં ઓછામાં ઓછા બે લોકોના મોત થયા હોવાના અને અનેક લોકો ઘાયલ થયા હોવાના સમાચાર પ્રાપ્ત થઈ રહ્યા છે. ઈરાની સરકારી મીડિયા અને રિવોલ્યુશનરી ગાર્ડ સાથે જોડાયેલા ન્યૂઝ આઉટલેટ 'નૂર ન્યૂઝ' ના જણાવ્યા અનુસાર, ઈસ્ફહાન પ્રાંતના ઉત્તરી વિસ્તારમાં આવેલા કાશાનમાં એક મહત્વપૂર્ણ રેલવે બ્રિજને નિશાન બનાવવામાં આવ્યો હતો, જેમાં બે વ્યક્તિઓએ જીવ ગુમાવ્યા છે.

સમગ્ર ઈરાનમાં ઈન્ફ્રાસ્ટ્રક્ચર પર મોટો એટેક:
ઈઝરાયેલી સેનાએ સત્તાવાર રીતે સ્વીકાર્યું છે કે તેમણે ઈરાનમાં ડઝનબંધ પાયાની સુવિધાઓ અને ઈન્ફ્રાસ્ટ્રક્ચર સાઈટ્સને નિશાન બનાવીને હુમલાની એક મોટી લહેર શરૂ કરી છે. ઈસ્ફહાન ઉપરાંત, તેહરાનથી ૮૦ માઈલ દક્ષિણમાં આવેલા કોમ વિસ્તારના એક મુખ્ય પુલ પર પણ હુમલો થયો હોવાના અહેવાલ છે. આ સિવાય ઉત્તર-પશ્ચિમમાં તબરીઝ-ઝેઝન ફ્રીવે અને ઉત્તરમાં કરજ સ્થિત રેલવે લાઈન પર પણ બોમ્બમારો કરવામાં આવ્યો છે, જેના કારણે ઈરાનનો વાહનવ્યવહાર અને સપ્લાય લાઈન ખોરવાઈ ગઈ છે.

ટ્રમ્પનું અગાઉથી કરેલું 'બ્રિજ ડે' નું એલાન:
રસપ્રદ વાત એ છે કે, આ હુમલાઓ અમેરિકી રાષ્ટ્રપતિ ડોનાલ્ડ ટ્રમ્પની સોશિયલ મીડિયા પોસ્ટ બાદ થયા છે. ટ્રમ્પે 'ટ્રુથ સોશિયલ' પર લખ્યું હતું કે, "મંગળવારનો દિવસ ઈરાનમાં 'પાવર પ્લાન્ટ ડે' અને 'બ્રિજ ડે' રહેશે. હોર્મુઝની સામુદ્રધુની ખોલી નાખો, નહીંતર નરક જેવી સ્થિતિ ભોગવવા તૈયાર રહો." ટ્રમ્પની આ ધમકીના ગણતરીના કલાકોમાં જ ઈઝરાયેલે પુલ અને વીજ મથકો પર પ્રહાર કરવાનું શરૂ કરી દીધું છે.

રાષ્ટ્રપતિ મસૂદ પેઝેશકિયાનનો મક્કમ નિર્ધાર:
ઈરાન પર થઈ રહેલા આ ચોતરફા હુમલાઓ વચ્ચે રાષ્ટ્રપતિ મસૂદ પેઝેશકિયાને ફરી એકવાર દેશવાસીઓનો જુસ્સો વધારતા નિવેદન આપ્યું છે. તેમણે 'X' પર પોસ્ટ કરતા જણાવ્યું કે, "અત્યાર સુધી ૧ કરોડ ૪૦ લાખથી વધુ ગૌરવશાળી ઈરાનીઓએ દેશની રક્ષા માટે પોતાની જાન કુરબાન કરવાની તૈયારી બતાવી છે. હું પોતે પણ દેશ માટે બલિદાન આપવા હંમેશા તૈયાર છું." ઈરાને સ્પષ્ટ કર્યું છે કે તેઓ અમેરિકા અને ઈઝરાયેલના દબાણ સામે ઝૂકશે નહીં, ભલે ગમે તેટલું નુકસાન વેઠવું પડે. હાલમાં સમગ્ર ઈરાનમાં યુદ્ધની સ્થિતિ અત્યંત ગંભીર બની ગઈ છે.