હરદોઈ : જ્યારે વિશ્વ આખું ઊર્જાના સંકટ સામે ઝઝૂમી રહ્યું છે, ત્યારે ઉત્તર પ્રદેશના હરદોઈ જિલ્લાના એક તેજસ્વી યુવા ઉદ્યોગસાહસિકે ગ્રામીણ સ્તરે અદભૂત મોડેલ વિકસાવીને સૌનું ધ્યાન ખેંચ્યું છે. યુકેની લિવરપૂલ યુનિવર્સિટીમાંથી MBAની ડિગ્રી મેળવ્યા બાદ મોટી કોર્પોરેટ કંપનીમાં નોકરી કરવાને બદલે આદિ ઉપેન્દ્ર તિવારીએ વતનમાં પરત ફરીને પર્યાવરણને અનુકૂળ ઊર્જા ઉત્પન્ન કરવાનો માર્ગ પસંદ કર્યો છે.
ગામડામાં ઊભું કર્યું ગ્રીન એનર્જી યુનિટ
૨૯ વર્ષીય આદિએ હરદોઈના ભૈલામાઉ ગામ પાસે અત્યાધુનિક બાયોગેસ પ્લાન્ટની સ્થાપના કરી છે. આ પ્લાન્ટમાં ગાયનું છાણ, શેરડીની પ્રેસ મડ (કચરો) અને ખેતરમાં વધેલા પાકના અવશેષોનો ઉપયોગ કરીને કોમ્પ્રેસ્ડ બાયોગેસ (CBG) બનાવવામાં આવે છે. અત્યારે આ પ્લાન્ટમાં દરરોજ ૨.૪ ટન ગેસનું ઉત્પાદન થઈ રહ્યું છે, જે પ્રદૂષણ ઘટાડવામાં અને સ્થાનિક ઊર્જા જરૂરિયાતો સંતોષવામાં મહત્વનો ભાગ ભજવે છે.
CNG અને PNGનો સસ્તો વિકલ્પ
ડેપ્યુટી કમિશનર (ઉદ્યોગ) હર્ષ પ્રતાપ સિંહે જણાવ્યું હતું કે આ પ્લાન્ટમાંથી મળતો ગેસ વાહનોમાં વપરાતા મોંઘા CNGના વિકલ્પ તરીકે અને ઘરોમાં પાઇપલાઇન દ્વારા મળતા PNG તરીકે વાપરી શકાય છે. આદિ તિવારીએ ૨૦૨૨માં પોતાનો અભ્યાસ પૂર્ણ કર્યા બાદ ૨૦૨૪માં આ પ્રોજેક્ટ પર કામ શરૂ કર્યું હતું અને સપ્ટેમ્બર ૨૦૨૫ સુધીમાં તો ગેસનું વ્યાવસાયિક ઉત્પાદન પણ શરૂ કરી દીધું હતું.
ભવિષ્યનું મોટું આયોજન
આદિ તિવારીની મહત્વાકાંક્ષા માત્ર ૨.૪ ટન સુધી સીમિત નથી. તેમણે જણાવ્યું હતું કે તેઓ નજીકના ભવિષ્યમાં આ પ્લાન્ટની ક્ષમતા વધારીને દરરોજ ૧૨ ટન સુધી લઈ જવાની યોજના ધરાવે છે. આ પહેલથી ન માત્ર ઊર્જા મળશે, પરંતુ સ્થાનિક ખેડૂતોને તેમના પાકના કચરા અને પશુપાલકોને છાણના યોગ્ય ભાવ પણ મળી રહેશે, જેનાથી ગ્રામીણ અર્થતંત્રને મોટો વેગ મળશે.
વિદેશી ડિગ્રીનો ઉપયોગ પોતાના દેશના વિકાસ માટે કેવી રીતે કરી શકાય, તે આદિ તિવારીએ સાબિત કરી બતાવ્યું છે. આજે હરદોઈનું આ નાનકડું ગામ ગ્રીન એનર્જીના ક્ષેત્રમાં સમગ્ર દેશ માટે એક નવું રોલ મોડેલ બની રહ્યું છે.