ઉત્તર પ્રદેશના રાજકારણમાં આગામી 2027ની વિધાનસભા ચૂંટણીને લઈને અત્યારથી જ ગરમાવો જોવા મળી રહ્યો છે. એનડીએ (NDA) ગઠબંધનમાં સામેલ ચિરાગ પાસવાનની લોક જનશક્તિ પાર્ટી (રામવિલાસ) એ એક મોટું અને ચોંકાવનારું એલાન કર્યું છે. પાર્ટીએ સ્પષ્ટ કર્યું છે કે તે યુપીની તમામ 403 વિધાનસભા બેઠકો પર એકલા હાથે ચૂંટણી લડશે.

પૂર્વી યુપીના પ્રદેશ અધ્યક્ષ રાજીવ પાસવાને પત્રકાર પરિષદમાં જણાવ્યું હતું કે, કેન્દ્રમાં અમારી પાર્ટી ભાજપ સાથે ગઠબંધનમાં છે, પરંતુ ઉત્તર પ્રદેશના સ્તરે કોઈ પણ પક્ષ સાથે ગઠબંધન નથી. તેમણે કહ્યું કે લોક જનશક્તિ પાર્ટી (રામવિલાસ) 'યુપી ફર્સ્ટ અને યુપી વાલે ફર્સ્ટ' ના મિશન સાથે ચૂંટણી મેદાનમાં ઉતરવાની તૈયારી કરી રહી છે. તેમણે વિશ્વાસ વ્યક્ત કર્યો કે 2027માં સત્તાની ચાવી તેમની પાર્ટીના હાથમાં હશે.

રાજીવ પાસવાને સપા અધ્યક્ષ અખિલેશ યાદવ અને કોંગ્રેસ નેતા રાહુલ ગાંધી પર આકરા પ્રહારો કર્યા હતા. તેમણે કહ્યું કે અખિલેશ યાદવ પીડીએ (PDA) ના નામે વંચિત સમાજને ગેરમાર્ગે દોરી રહ્યા છે. તેમણે અખિલેશ અને રાહુલ ગાંધી પર પ્રશ્ન ઉઠાવતા કહ્યું કે, જ્યારે તેમની સરકાર હતી ત્યારે તેમને કાંશીરામને ભારત રત્ન આપવાનું યાદ કેમ ન આવ્યું? તેમણે વધુમાં આરોપ લગાવ્યો કે કોંગ્રેસે જ બાબા સાહેબ ભીમરાવ આંબેડકરને બે વખત લોકસભાની ચૂંટણીમાં હરાવવાનું કામ કર્યું હતું.

પાર્ટી નેતાએ દાવો કર્યો કે તેઓ દલિતોના મસીહા ગણાતા રામવિલાસ પાસવાનના કાર્યો અને સિદ્ધાંતોને લઈને જનતાની વચ્ચે જઈ રહ્યા છે અને તેમને લોકોનો ખૂબ જ સારો પ્રતિસાદ મળી રહ્યો છે. નોંધનીય છે કે ચિરાગ પાસવાન પોતે કેન્દ્રમાં મંત્રી છે અને તેમની પાર્ટી બિહાર સરકારમાં પણ ભાગીદાર છે. હવે ઉત્તર પ્રદેશમાં એકલા હાથે ચૂંટણી લડવાના નિર્ણયથી રાજ્યનું રાજકીય સમીકરણ બદલાઈ શકે છે.