કરનાલ : હરિયાણાના કરનાલ શહેરમાં કાયદો અને વ્યવસ્થાના ધજાગરા ઉડાવતી એક સનસનાટીભર્યા ઘટના સામે આવી છે. સેક્ટર-૬ ચોક પર ટ્રાફિક નિયમન કરી રહેલા પોલીસ કર્મચારી કુલબીર સિંહે જ્યારે કાળા કાચ અને નંબર પ્લેટ વગરની શંકાસ્પદ કારને રોકવાનો ઈશારો કર્યો, ત્યારે કાર ચાલક સગીરે ઉભા રહેવાને બદલે ગાડીની રફ્તાર વધારી દીધી હતી. ટક્કર એટલી જોરદાર હતી કે પોલીસ જવાન સીધો કારના બોનેટ પર ફંગોળાયો હતો. આ નિર્દિષ્ટ સગીરે માનવતા નેવે મૂકીને પોલીસકર્મી બોનેટ પર હોવા છતાં કાર ઉભી રાખવાને બદલે તેને અંદાજે ૫૦ મીટર સુધી રસ્તા પર ઢસડ્યો હતો. સદનસીબે અન્ય વાહનચાલકો વચ્ચે આવતા પોલીસ જવાન નીચે ઉતરી શક્યા હતા અને આરોપી કાર લઈને ફરાર થઈ ગયો હતો.

આ સમગ્ર ઘટના નજીકના સીસીટીવી કેમેરામાં કેદ થઈ ગઈ હતી, જેના આધારે પોલીસે તપાસના ચક્રો ગતિમાન કર્યા હતા. તપાસ દરમિયાન જાણવા મળ્યું કે કારમાં સગીર ચાલક સાથે તેની એક સગીર મિત્ર પણ સવાર હતી. ધરપકડથી બચવા માટે આ ચતુર સગીરે ઘટના બાદ તરત જ કાર પર નંબર પ્લેટ લગાવી દીધી હતી અને કાચ પરથી કાળી ફિલ્મ પણ ઉતારી નાખી હતી જેથી કોઈ તેને ઓળખી ન શકે. જોકે, પોલીસે ટેકનિકલ સર્વેલન્સ અને સીસીટીવીની મદદથી સેક્ટર-૬ ની માર્કેટમાંથી કાર શોધી કાઢી હતી અને આરોપી સગીરની અટકાયત કરી હતી. પૂછપરછ દરમિયાન તેણે પોતાનો ગુનો કબૂલી લીધો છે.

પોલીસ તપાસમાં વધુ એક ચોંકાવનારો ખુલાસો થયો છે કે પકડાયેલા સગીરની માતા ઓસ્ટ્રેલિયામાં પીઆર (પર્મનન્ટ રેસિડેન્ટ) ધરાવે છે અને પરિવાર આર્થિક રીતે સધ્ધર છે. સગીર વયે કાર ચલાવવી અને તે પણ નિયમોના ભંગ સાથે, તે બાબતે પોલીસે વાલીઓની ભૂમિકા અંગે પણ તપાસ શરૂ કરી છે. હાલમાં પોલીસે આરોપી વિરુદ્ધ સરકારી કર્મચારીની ફરજમાં રુકાવટ અને જીવલેણ હુમલો કરવા બદલ ગુનો નોંધી તેને જુવેનાઈલ કોર્ટમાં રજૂ કર્યો છે. ટ્રાફિક પોલીસના જવાન કુલબીર સિંહને સારવાર અર્થે હોસ્પિટલ ખસેડવામાં આવ્યા છે, જ્યાં તેમની હાલત સ્થિર હોવાનું જાણવા મળ્યું છે. આ ઘટનાએ શહેરમાં સગીરો દ્વારા થતા જોખમી ડ્રાઇવિંગ સામે લાલબત્તી ધરી છે.