નવી દિલ્‍હીઃ મધ્ય પૂર્વમાં ચાલી રહેલા ભયાનક યુદ્ધના 37 દિવસ પૂરા થતાની સાથે જ વૈશ્વિક બજારોમાં મોટી ઉથલપાથલ જોવા મળી રહી છે. ખાસ કરીને સુરક્ષિત રોકાણ ગણાતા સોના અને ચાંદીના ભાવમાં અત્યાર સુધીનો સૌથી મોટો કડાકો બોલાયો છે. અમેરિકી પ્રમુખ ડોનાલ્ડ ટ્રમ્પ દ્વારા ઈરાનને અપાયેલા 48 કલાકના અલ્ટીમેટમ અને મજબૂત બનતા ડોલરને કારણે કિંમતી ધાતુઓના ભાવ નીચે સરક્યા છે. 28 ફેબ્રુઆરીથી અત્યાર સુધીના ગાળામાં ચાંદીના ભાવમાં પ્રતિ કિલોગ્રામ 50,000 રૂપિયાથી વધુનો ઘટાડો નોંધાયો છે, જેના કારણે દાગીના બજાર અને કોમોડિટી માર્કેટમાં સન્નાટો વ્યાપી ગયો છે. સામાન્ય રીતે યુદ્ધ જેવી સ્થિતિમાં સોનાના ભાવ વધતા હોય છે, પરંતુ હાલની અસ્થિરતામાં ગણતરીઓ ઉંધી પડી રહી છે.

ચાંદીના ભાવમાં જોવા મળેલો આ ક્રેશ રોકાણકારો માટે મોટો આંચકો સાબિત થયો છે. એમસીએક્સ (MCX) પર ગત 28 ફેબ્રુઆરીએ ચાંદીનો ભાવ પ્રતિ કિલો 2,82,644 રૂપિયાના સ્તરે હતો, જે 2 એપ્રિલ સુધીમાં ઘટીને 2,32,600 રૂપિયા પર બંધ થયો હતો. આમ, માત્ર એક મહિનાના ટૂંકા ગાળામાં ચાંદી 50,044 રૂપિયા જેટલી સસ્તી થઈ છે. ઉંચા સ્તરેથી થયેલા આ મસમોટા ઘટાડાને કારણે જેમણે ઉંચા ભાવે ખરીદી કરી હતી તેવા વેપારીઓ અને ગ્રાહકોની હાલત કફોડી બની છે. બજારના વિશ્લેષકો માને છે કે આર્થિક અનિશ્ચિતતા અને વૈશ્વિક શેરબજારોમાં જોવા મળતી અફરાતફરીને પગલે રોકાણકારો સોના-ચાંદીમાંથી નાણાં પરત ખેંચી રહ્યા છે.

સોનાના બજારમાં પણ આવી જ કંઈક સ્થિતિ જોવા મળી રહી છે, જ્યાં 10 ગ્રામ દીઠ ભાવમાં મોટું ગાબડું પડ્યું છે. 27 ફેબ્રુઆરીના રોજ 24 કેરેટ સોનાનો વાયદા ભાવ 1,65,659 રૂપિયા હતો, જે હવે ઘટીને 1,49,650 રૂપિયા પ્રતિ 10 ગ્રામ સુધી નીચે આવ્યો છે. આંતરરાષ્ટ્રીય સ્તરે બદલાતા સમીકરણો અને યુદ્ધ વધુ લાંબુ ખેંચાવાના સંકેતો વચ્ચે સોનામાં જોવા મળેલી આ નરમાઈ ખરીદદારો માટે તક સમાન છે, પરંતુ રોકાણકારો માટે ચિંતાનો વિષય છે. યુદ્ધની આ ગંભીર પરિસ્થિતિમાં માત્ર મધ્ય પૂર્વ જ નહીં, પરંતુ સમગ્ર વિશ્વના નાણાકીય બજારો દબાણ હેઠળ છે, અને જો સ્થિતિ વધુ વણસશે તો આગામી દિવસોમાં સોના-ચાંદીના ભાવમાં વધુ ઉતાર-ચઢાવ જોવા મળી શકે છે.