નવી દિલ્હી:  લોકસભા અને વિધાનસભાઓની બેઠકોમાં ધરખમ વધારો કરવાના કેન્દ્ર સરકારના પ્રસ્તાવને લઈને દેશમાં રાજકીય ગરમાવો આવી ગયો છે. કોંગ્રેસે રવિવારે વડાપ્રધાન નરેન્દ્ર મોદી પર આકરા પ્રહારો કરતા આ કવાયતને "જનતાનું ધ્યાન ભટકાવવાનું શસ્ત્ર" (WMD) ગણાવ્યું છે. કોંગ્રેસના મહાસચિવ જયરામ રમેશે આરોપ લગાવ્યો છે કે સરકાર આર્થિક અને વિદેશ નીતિના મોરચે પોતાની નિષ્ફળતાઓ છુપાવવા માટે સીમાંકનનો મુદ્દો ઉછાળી રહી છે. વડાપ્રધાને બજેટ સત્ર લંબાવીને મહિલા અનામત કાયદાને 2029 થી લાગુ કરવા માટે બેઠકોની સંખ્યા 50% વધારવાનો જે સંકેત આપ્યો છે, તેને વિપક્ષે દક્ષિણ ભારતના રાજ્યો સાથેની "છેતરપિંડી" ગણાવી છે.

જયરામ રમેશે આંકડાકીય વિગતો આપતા તર્ક રજૂ કર્યો છે કે જો બેઠકો વધારવામાં આવશે તો ઉત્તર પ્રદેશ અને કેરળ જેવા રાજ્યો વચ્ચેનો રાજકીય તફાવત અત્યંત વધી જશે. ઉદાહરણ તરીકે, યુપી અને કેરળ વચ્ચે હાલમાં 60 બેઠકોનો તફાવત છે, જે નવા પ્રસ્તાવ મુજબ વધીને 90 થઈ શકે છે. તેવી જ રીતે તમિલનાડુ અને યુપી વચ્ચેની ખાઈ પણ વધુ ઊંડી થશે. કોંગ્રેસનું કહેવું છે કે આ પગલાથી માત્ર દક્ષિણ ભારત જ નહીં, પરંતુ પંજાબ, હરિયાણા અને ઉત્તર-પૂર્વના રાજ્યોનો સંસદીય પ્રભાવ નોંધપાત્ર રીતે ઘટી જશે. વિપક્ષે આક્ષેપ કર્યો છે કે વડાપ્રધાન વસ્તીવાળા રાજ્યોને વધુ બેઠકો આપીને પોતાની સત્તા મજબૂત કરવા માંગે છે, જે સંઘીય માળખા માટે જોખમી છે.

બીજી તરફ, વડાપ્રધાન મોદીએ કેરળની રેલીમાં સ્પષ્ટતા કરી હતી કે સીમાંકનથી કોઈ પણ રાજ્યને નુકસાન નહીં થાય અને સરકાર 16 થી 18 એપ્રિલના ખાસ સત્ર દરમિયાન આ અંગે કાનૂની મહોર મારશે. સરકારનો મુખ્ય ઉદ્દેશ્ય મહિલાઓને 33 ટકા અનામતનો લાભ 2029 ની ચૂંટણીથી જ મળે તે સુનિશ્ચિત કરવાનો છે, જેના માટે બેઠકોની સંખ્યા 543 થી વધારીને 816 કરવી અનિવાર્ય છે. જોકે, કોંગ્રેસે આ ઉતાવળિયા નિર્ણયને પશ્ચિમ બંગાળ અને તમિલનાડુની આગામી ચૂંટણીઓમાં રાજકીય લાભ મેળવવાની યુક્તિ ગણાવી છે. આચારસંહિતાના ઉલ્લંઘન અને વ્યાપક જાહેર ચર્ચાના અભાવે આ મુદ્દો હવે સંસદના આગામી સત્રમાં તોફાની બનવાના એંધાણ આપી રહ્યો છે.