હોંગકોંગ:વૈશ્વિક સ્તરે ક્રૂડ ઓઈલના ભાવમાં વધઘટ વચ્ચે હોંગકોંગ હાલમાં વિશ્વનું સૌથી મોંઘું ઈંધણ ધરાવતું શહેર બની ગયું છે. મધ્ય-પૂર્વમાં ઈરાન અને ઈઝરાયેલ વચ્ચે વધતા જતા યુદ્ધના તણાવને કારણે વૈશ્વિક બજારમાં ક્રૂડની સપ્લાય પર અસર પડી છે, જેની સીધી અસર હોંગકોંગના પેટ્રોલ પંપો પર જોવા મળી રહી છે. અહીં એક લિટર પેટ્રોલની કિંમત ભારતીય રૂપિયામાં આશરે 275 થી 280 રૂપિયાની આસપાસ પહોંચી ગઈ છે.
કેમ હોંગકોંગમાં ભાવ આટલા વધારે છે?
હોંગકોંગમાં પેટ્રોલના ઉંચા ભાવ પાછળ મુખ્ય ત્રણ કારણો જવાબદાર ગણાય છે:
૧. ભારે ટેક્સ: હોંગકોંગ સરકાર પેટ્રોલ પર ખૂબ જ ઊંચી ડ્યુટી અને ટેક્સ વસૂલે છે. સરકારનો ઉદ્દેશ્ય પ્રદૂષણ ઘટાડવા અને લોકોને ખાનગી વાહનોને બદલે જાહેર પરિવહનનો ઉપયોગ કરવા પ્રોત્સાહિત કરવાનો છે.
૨. જમીનની અછત: અહીં સ્ટોરેજ ફેસિલિટી અને પેટ્રોલ પંપ માટે જમીન ખૂબ જ મોંઘી છે, જેના કારણે ઓપરેટિંગ ખર્ચ વધી જાય છે.
૩. સ્પર્ધાનો અભાવ: ઈંધણ બજારમાં ગણતરીની કંપનીઓનું વર્ચસ્વ હોવાથી સ્પર્ધા ઓછી છે, જેનો સીધો ફાયદો કંપનીઓ ઉંચા ભાવ વસૂલીને ઉઠાવે છે.
ઈરાન-ઈઝરાયેલ યુદ્ધની અસર:
તાજેતરમાં ઈરાન અને ઈઝરાયેલ વચ્ચે શરૂ થયેલા સંઘર્ષને કારણે તેલના પુરવઠામાં વિક્ષેપ પડવાની આશંકા વધી ગઈ છે. હોંગકોંગ પોતાની ઈંધણની જરૂરિયાત માટે સંપૂર્ણપણે આયાત પર નિર્ભર હોવાથી આંતરરાષ્ટ્રીય બજારમાં થતી મામૂલી વધઘટની અહીં મોટી અસર થાય છે.
નિષ્ણાંતોના મતે, જો મધ્ય-પૂર્વમાં તણાવ ઓછો નહીં થાય, તો હોંગકોંગમાં પેટ્રોલના ભાવ હજુ પણ વધી શકે છે, જેની અસર જીવનજરૂરી ચીજવસ્તુઓના પરિવહન ખર્ચ પર પણ પડશે અને મોંઘવારી વધુ આકરી બનશે.