મુંબઈ : ભારતીય શેરબજારમાં આઈપીઓ (IPO) લાવવા માટે કંપનીઓમાં અભૂતપૂર્વ ઉત્સાહ જોવા મળી રહ્યો છે. માર્ચ 2026ના માત્ર એક જ મહિનામાં નાની-મોટી કુલ 38 કંપનીઓએ મૂડી બજાર નિયમનકાર સેબી (SEBI) સમક્ષ પોતાના પ્રારંભિક દસ્તાવેજો રજૂ કર્યા છે. આ આંકડો ગત વર્ષના માર્ચ મહિનાની સરખામણીએ ઘણો મોટો છે, જે દર્શાવે છે કે ભારતીય અર્થતંત્ર અને શેરબજાર પ્રત્યે કંપનીઓનો ભરોસો સતત વધી રહ્યો છે. આગામી સમયમાં રિલાયન્સ ઈન્ડસ્ટ્રીઝની ટેલિકોમ કંપની જિયો અને નેશનલ સ્ટોક એક્સચેન્જ (NSE) જેવા મસમોટા આઈપીઓ બજારમાં દસ્તક દેવા જઈ રહ્યા છે, જે રોકાણકારો માટે કમાણીની મોટી તક બની શકે છે.

આ વખતે એક નવો ટ્રેન્ડ પણ જોવા મળ્યો છે, જેમાં 38 માંથી 9 કંપનીઓએ 'કોન્ફિડેન્શિયલ પ્રી-ફાઇલિંગ' એટલે કે ગુપ્ત માર્ગ પસંદ કર્યો છે. આ ખાસ સુવિધા હેઠળ ટોરેન્ટ ગેસ, જેટકાર્ક અને ગરુડ એરોસ્પેસ જેવી કંપનીઓ લિસ્ટિંગ અંગેનો અંતિમ નિર્ણય ન લેવાય ત્યાં સુધી પોતાની સંવેદનશીલ વ્યવસાયિક વિગતો અને નાણાકીય માહિતી સ્પર્ધકોથી સુરક્ષિત રાખી શકે છે. જો બજારની સ્થિતિ સાનુકૂળ ન જણાય, તો આ કંપનીઓ જાહેરમાં કોઈ પણ વિગત જાહેર કર્યા વગર પોતાનો ડ્રાફ્ટ પાછો પણ ખેંચી શકે છે. અત્યાર સુધીમાં 64 કંપનીઓ સેબીની મંજૂરીની રાહ જોઈ રહી છે, જ્યારે 124 કંપનીઓને મંજૂરી મળી ગઈ હોવા છતાં તેઓ યોગ્ય સમયની રાહ જોઈ રહી છે.

નાણાકીય વર્ષ 2025-26 દરમિયાન મેઈનબોર્ડ સેગમેન્ટમાં કુલ 109 આઈપીઓ લોન્ચ થયા હતા, જેમાંથી મોટાભાગની કંપનીઓએ રોકાણકારોને લિસ્ટિંગના દિવસે જ જંગી નફો કરાવ્યો છે. જોકે, ભૂ-રાજકીય તણાવ અને વૈશ્વિક અનિશ્ચિતતાને કારણે PhonePe જેવી દિગ્ગજ ડિજિટલ પેમેન્ટ કંપનીએ હાલમાં લિસ્ટિંગ પ્લાન મુલતવી રાખ્યો છે, છતાં તેમણે ભારતીય બજારમાં જ લિસ્ટ થવાની પોતાની કટિબદ્ધતા દર્શાવી છે. માર્ચ મહિનામાં SBI ફંડ્સ મેનેજમેન્ટ અને મણિપાલ હેલ્થ જેવી મોટી કંપનીઓએ પણ મેદાને ઝંપલાવ્યું છે, જેના કારણે આગામી નાણાકીય વર્ષ શેરબજાર માટે ખૂબ જ વ્યસ્ત અને નફાકારક રહેવાની પૂરેપૂરી શક્યતા છે.