નવી દિલ્હી: કર્મચારી ભવિષ્ય નિધિ સંગઠન (EPFO) એ તેના કરોડો સબ્સ્ક્રાઇબર્સ માટે નવા વર્ષમાં મોટી ભેટ આપી છે. 'EPFO 3.0' પ્રોજેક્ટ હેઠળ હવે પીએફ ઓફિસોના ધક્કા ખાવાના દિવસો ઈતિહાસ બની જશે. શ્રમ અને રોજગાર રાજ્ય મંત્રી શોભા કરંદલાજેએ સંસદમાં મહત્વની જાહેરાત કરતા જણાવ્યું હતું કે, હવે 5 લાખ રૂપિયા સુધીના ઉપાડ માટે કોઈ અધિકારીની મંજૂરીની રાહ જોવી નહીં પડે. સોફ્ટવેર દ્વારા ઓટો-સેટલમેન્ટની મર્યાદા વધારી દેવામાં આવી છે, જેના કારણે લાખો કર્મચારીઓના દાવાઓ હવે ગણતરીની મિનિટોમાં જ મંજૂર થઈ સીધા બેંક ખાતામાં જમા થઈ જશે. 25 ફેબ્રુઆરી 2026 સુધીમાં અંદાજે સાડા ત્રણ કરોડથી વધુ ક્લેમ આ નવી સિસ્ટમ દ્વારા સફળતાપૂર્વક ચૂકવવામાં આવ્યા છે.

ડિજિટલ સુધારાની આ શ્રેણીમાં સૌથી મોટી રાહત નોકરી બદલતા કર્મચારીઓને મળી છે. અગાઉ જૂની કંપનીમાંથી નવી કંપનીમાં પીએફ ટ્રાન્સફર કરાવવો એક મોટો માથાનો દુખાવો હતો, પરંતુ હવે નવી સિસ્ટમ હેઠળ પીએફ બેલેન્સનું ટ્રાન્સફર સંપૂર્ણપણે સ્વચાલિત (ઓટો-ટ્રાન્સફર) કરી દેવામાં આવ્યું છે. આ ઉપરાંત, દેશના 70 લાખ પેન્શનરો માટે 'સેન્ટ્રલાઇઝ્ડ પેન્શન પેમેન્ટ સિસ્ટમ' (CPPS) અમલમાં મૂકવામાં આવી છે. આ વ્યવસ્થાથી પેન્શન વિતરણની પ્રક્રિયા પહેલા કરતા વધુ પારદર્શક અને ઝડપી બની છે, જેનો સીધો લાભ નિવૃત્ત કર્મચારીઓને મળી રહ્યો છે. હવે પેન્શનરોને તેમના હકની રકમ માટે લાંબી રાહ જોવી પડશે નહીં.

ટેકનોલોજીના આ યુગમાં EPFO હવે UPI દ્વારા પણ નાણાં ઉપાડવાની સુવિધા લાવવાની દિશામાં કામ કરી રહ્યું છે, જે હાલમાં અંતિમ તબક્કામાં છે. આ સાથે જ નાણાકીય વર્ષ 2025-26 માટે પીએફ થાપણો પર 8.25% વ્યાજ દર યથાવત રાખવામાં આવ્યો છે, જે રોકાણકારો માટે ખુશીના સમાચાર છે. જે ટ્રસ્ટો હજુ સુધી નિયમો હેઠળ આવ્યા નથી તેમના માટે સરકારે છ મહિનાની ખાસ માફી યોજના પણ જાહેર કરી છે, જેથી તેઓ દંડ વગર નિયમોનું પાલન કરી શકે. આ તમામ ફેરફારો બાદ હવે પીએફ ખાતાધારકોને નાણાકીય વ્યવહારોમાં અભૂતપૂર્વ સરળતા અને સુરક્ષાનો અનુભવ થશે.