તેહરાન:ઈરાન અને અમેરિકા વચ્ચે ચાલી રહેલો સંઘર્ષ હવે અત્યંત ખતરનાક વળાંક પર પહોંચ્યો છે. અમેરિકાના એફ-૧૫ અને એ-૧૦ ફાઈટર જેટ તોડી પાડ્યા બાદ હવે ઈરાને દાવો કર્યો છે કે તેણે ઈસ્ફહાન વિસ્તારમાં અમેરિકાનું સી-૧૩૦ (C-130) માલવાહક વિમાન તોડી પાડ્યું છે. ફાર્સ ન્યૂઝ એજન્સીના અહેવાલ મુજબ, આ હુમલામાં વિમાનમાં સવાર પાંચ લોકોના મોત નિપજ્યા છે. ઈરાની સશસ્ત્ર દળોની એકીકૃત કમાન દ્વારા આ કાર્યવાહીની પુષ્ટિ કરવામાં આવી છે.

પાઈલટના રેસ્ક્યુ મિશન પર હુમલો:
મળતી વિગતો અનુસાર, આ સમગ્ર ઘટનાક્રમ ત્યારે શરૂ થયો જ્યારે અમેરિકાએ તેના એફ-૧૫ ફાઈટર જેટના લાપતા પાઈલટને શોધવા માટે રેસ્ક્યુ મિશન હાથ ધર્યું હતું. ઈરાની અધિકારીઓના જણાવ્યા મુજબ, તોડી પાડવામાં આવેલું સી-૧૩૦ વિમાન આ જ બચાવ અભિયાનનો હિસ્સો હતું. ઈરાનની વિશેષ પોલીસ કમાન્ડો યુનિટ 'ફરાજ રેન્જર્સ' દ્વારા આ વિમાનને નિશાન બનાવવામાં આવ્યું હતું. અગાઉ અમેરિકાએ આ મિશનમાં રોકાયેલા બે બ્લેક હોક હેલિકોપ્ટરોના નુકસાનની પુષ્ટિ કરી છે, પરંતુ સી-૧૩૦ વિમાન અંગે હજુ સુધી વોશિંગ્ટન તરફથી કોઈ સત્તાવાર પ્રતિક્રિયા આપવામાં આવી નથી.

સંયુક્ત ઓપરેશનમાં અમેરિકી વિમાનનો ખાત્મો:
ઈરાની પોલીસ કમાન્ડે જાહેરાત કરી છે કે ઈસ્ફહાનના દક્ષિણ વિસ્તારમાં આ વિમાનને તોડી પાડવામાં આવ્યું છે. આ ઓપરેશનમાં એરોસ્પેસ, થલ સેના, લોકપ્રિય એકમો, બાસિજ અને પોલીસ કમાન્ડ દ્વારા સંયુક્ત રીતે દુશ્મનના ઉડતા લક્ષ્યોને નષ્ટ કરવામાં આવ્યા હતા. તસનીમ સમાચાર એજન્સીએ પ્રાંતીય અધિકારી ઈરાજ કાઝેમીઝુના હવાલાથી જણાવ્યું છે કે દક્ષિણ-પશ્ચિમ કોહગીલુયેહ અને બોયર-અહમદ પ્રાંતના કોહ-એ સિયાહ વિસ્તારમાં થયેલા આ હુમલામાં પાંચ લોકોએ જીવ ગુમાવ્યા છે.

ઈઝરાયલી ડ્રોન પણ તોડી પાડ્યું:
ઈરાની સશસ્ત્ર દળોના પ્રવક્તાએ જણાવ્યું છે કે તોડી પાડવામાં આવેલા વિમાનોમાં એક સી-૧૩૦ સૈન્ય પરિવહન વિમાન અને બે બ્લેક હોક હેલિકોપ્ટરનો સમાવેશ થાય છે. આ ઉપરાંત, રવિવારે ઈરાની સેનાએ તે જ પ્રાંતમાં એક ઈઝરાયલી ડ્રોનને પણ તોડી પાડ્યાનો દાવો કર્યો હતો. આ ઘટનાઓને પગલે ખાડી દેશોમાં તણાવ ચરમસીમાએ પહોંચ્યો છે અને અમેરિકાના આગામી પગલા પર સમગ્ર વિશ્વની મીટ મંડાયેલી છે.