વેટિકન સિટી : વિશ્વભરના કેથોલિક સંપ્રદાયના સર્વોચ્ચ વડા પોપ લીઓએ અમેરિકા અને ઈરાન વચ્ચે ચાલી રહેલા યુદ્ધ મુદ્દે અત્યંત કડક વલણ અપનાવ્યું છે. મૂળ અમેરિકન હોવા છતાં, પોપ લીઓએ રાષ્ટ્રપતિ ડોનાલ્ડ ટ્રમ્પની વિદેશ નીતિ અને સૈન્ય હુમલાઓની જાહેરમાં ટીકા કરીને સૌને ચોંકાવી દીધા છે. મંગળવારે આપેલા એક નિવેદનમાં તેમણે પ્રથમ વખત સીધું જ ટ્રમ્પનું નામ લઈને આ વિનાશક સંઘર્ષનો અંત લાવવા અને શાંતિ માટેનો 'ઓફ-રેમ્પ' (બહાર નીકળવાનો માર્ગ) શોધવા અપીલ કરી છે.

ભગવાન યુદ્ધખોર નેતાઓની પ્રાર્થના નકારે છે

પોપ લીઓએ રવિવારે અત્યંત ગંભીર શબ્દોમાં ચેતવણી આપી હતી કે, જે નેતાઓ યુદ્ધ શરૂ કરે છે અને જેમના હાથ નિર્દોષોના લોહીથી ભરેલા છે, તેમની પ્રાર્થના ભગવાન ક્યારેય સાંભળતા નથી. નિષ્ણાતો આ ટિપ્પણીને અમેરિકી સંરક્ષણ સચિવ પીટ હેગસેથ સામેનો પ્રહાર ગણાવી રહ્યા છે, જેઓ ઈરાન પરના હુમલાઓને ખ્રિસ્તી ધર્મના નામે વાજબી ઠેરવી રહ્યા છે. વ્હાઇટ હાઉસે આના જવાબમાં જણાવ્યું છે કે લશ્કરી નેતાઓ કે રાષ્ટ્રપતિ દ્વારા જવાનો માટે પ્રાર્થના કરવામાં કંઈ ખોટું નથી.

અમેરિકી કેથોલિક નેતૃત્વમાં મોટો ફેરફાર

માત્ર નિવેદનો જ નહીં, પરંતુ પોપ લીઓએ સંગઠનાત્મક સ્તરે પણ ટ્રમ્પવાદ સામે મજબૂત કિલ્લેબંધી શરૂ કરી હોય તેવું જણાય છે. ગત ડિસેમ્બરમાં તેમણે ન્યૂયોર્કના આર્કબિશપ તરીકે રૂઢિચુસ્ત ગણાતા કાર્ડિનલ ટીમોથી ડોલનને હટાવીને સામાજિક ન્યાયના પક્ષધર ગણાતા રોનાલ્ડ હિક્સની નિમણૂક કરી હતી. આ ફેરફાર સૂચવે છે કે પોપ અમેરિકામાં ચર્ચના વહીવટને વધુ ઉદારવાદી બનાવવા માંગે છે.

ઇસ્ટર પહેલા શાંતિનો સંદેશ

પોપ લીઓએ છેલ્લા કેટલાક અઠવાડિયાથી ઈરાન યુદ્ધ વિરુદ્ધ પોતાનો અવાજ બુલંદ કર્યો છે. ૧૩ માર્ચે તેમણે કહ્યું હતું કે યુદ્ધ કરનારા ખ્રિસ્તી નેતાઓએ ઈસુના ઉપદેશોનું પાલન કરે છે કે નહીં તેનું આત્મનિરીક્ષણ કરવું જોઈએ. ૨૩ માર્ચે તેમણે હવાઈ હુમલાઓને 'આડેધડ હિંસા' ગણાવી તેના પર પ્રતિબંધની માંગ કરી હતી.

આવનારા રવિવારે ઇસ્ટર નિમિત્તે પોપ લીઓ સેન્ટ પીટર બેસિલિકાની બાલ્કનીમાંથી વિશ્વને આશીર્વાદ આપશે. માનવામાં આવે છે કે આ ભાષણ દરમિયાન તેઓ ઈરાન યુદ્ધ અને વૈશ્વિક શાંતિ અંગે કોઈ મોટી આંતરરાષ્ટ્રીય અપીલ કરી શકે છે, જેના પર સમગ્ર દુનિયાની નજર છે.

શું વિશ્વના સૌથી શક્તિશાળી નેતા ટ્રમ્પ, વિશ્વના સૌથી મોટા નૈતિક અવાજ ગણાતા પોપ લીઓની આ વિનંતી સ્વીકારશે? આ સવાલ અત્યારે વૈશ્વિક રાજકારણના કેન્દ્રમાં છે.