નવી દિલ્હી : ભારતીય મ્યુઝિક ઇન્ડસ્ટ્રીના જાણીતા રેપર્સ યો યો હની સિંહ અને બાદશાહ ફરી એકવાર કાનૂની મુશ્કેલીમાં મુકાયા છે. વર્ષ ૨૦૦૬માં રિલીઝ થયેલા અને વિવાદોના વંટોળમાં રહેલા 'વોલ્યુમ-૧' નામના ગીત સામે દિલ્હી હાઈકોર્ટે કડક વલણ અપનાવ્યું છે. ગુરુવારે સુનાવણી દરમિયાન હાઈકોર્ટે આ ગીતને 'અભદ્ર અને અપમાનજનક' ગણાવીને તમામ ઓનલાઈન પ્લેટફોર્મ પરથી તાત્કાલિક દૂર કરવાનો નિર્દેશ આપ્યો છે.

કોર્ટનો અંતરાત્મા હચમચી ગયો

જસ્ટિસ પુરુષેન્દ્ર કુમાર કૌરવની સિંગલ બેન્ચે આ મામલે સુનાવણી કરતા જણાવ્યું હતું કે, ગીતના શબ્દો સાંભળીને કોર્ટનો અંતરાત્મા હચમચી ગયો છે. જજે નોંધ્યું હતું કે વાણી સ્વાતંત્ર્ય અને કલાત્મક આઝાદીના બહાને આ પ્રકારની અશ્લીલ સામગ્રી પીરસવાની છૂટ આપી શકાય નહીં, ખાસ કરીને જ્યારે તે સગીરો સુધી સરળતાથી પહોંચી શકતી હોય. જસ્ટિસે પોતાના ચેમ્બરમાં આ ગીત સાંભળ્યા બાદ ટિપ્પણી કરી હતી કે આમાં કોઈ કલાત્મક મૂલ્ય નથી, ઉલટાનું સ્ત્રીઓને માત્ર જાતીય તૃપ્તિના પદાર્થ તરીકે જ દર્શાવવામાં આવી છે.

'માફિયા મુંડિર' અને લાખો વ્યૂઝ પર તરાપ

આ ગીત હની સિંહ અને બાદશાહના જૂના ગ્રુપ 'માફિયા મુંડિર' હેઠળ તૈયાર કરવામાં આવ્યું હતું. ભલે આ ગીત ૨૦ વર્ષ પહેલાં 'અંડરગ્રાઉન્ડ' રિલીઝ થયું હતું, પરંતુ યુટ્યુબ અને સ્પોટિફાય જેવા પ્લેટફોર્મ પર તેના વિવિધ વર્ઝન લાખો વ્યૂઝ મેળવી રહ્યા હતા. હિન્દુ શક્તિ દળ દ્વારા દાખલ કરવામાં આવેલી અરજીમાં માંગ કરવામાં આવી હતી કે આ ગીત સ્ત્રીઓ પ્રત્યે હિંસા ઉશ્કેરે છે, તેથી તેને ડિજિટલ દુનિયામાંથી કાયમ માટે ભૂંસી નાખવું જોઈએ.

સરકારને કડક આદેશ અને આગામી સુનાવણી

કોર્ટે માત્ર રેપર્સને જ નહીં, પરંતુ કેન્દ્ર સરકારને પણ નિર્દેશ આપ્યો છે કે અરજદાર દ્વારા પૂરા પાડવામાં આવેલા તમામ URL ને તાત્કાલિક બ્લોક કરવામાં આવે. હની સિંહ અને બાદશાહને આ મામલે નોટિસ જારી કરવામાં આવી છે અને તેમને જાહેર માફી માંગવા માટે પણ દબાણ કરવામાં આવી રહ્યું છે. હવે આ કેસની આગામી સુનાવણી ૭ મેના રોજ હાથ ધરવામાં આવશે.

આ ચુકાદાએ સાબિત કરી દીધું છે કે કલાના નામે પીરસવામાં આવતી અશ્લીલતા સામે કાયદો ગમે ત્યારે સક્રિય થઈ શકે છે, પછી ભલે તે ૨૦ વર્ષ જૂની વાત કેમ ન હોય!