સિરોહી: રાજસ્થાનના સિરોહી જિલ્લામાંથી સોશિયલ મીડિયા પર સસ્તી પ્રસિદ્ધિ મેળવવા માટે કરવામાં આવેલા એક અત્યંત જોખમી સ્ટંટનો વીડિયો સામે આવ્યો છે. વાયરલ વીડિયોમાં એક યુવક પેટ્રોલ પંપ પર પોતાની સ્કોર્પિયો એસયુવી (SUV) ને પાણીને બદલે મોંઘા દાટ ડીઝલથી ધોતો જોવા મળ્યો હતો. આ હરકતને કારણે માત્ર ઈંધણનો બગાડ જ નથી થયો, પરંતુ પેટ્રોલ પંપ જેવા સંવેદનશીલ સ્થળે મોટી દુર્ઘટના કે આગ લાગવાનું ગંભીર જોખમ પણ ઊભું થયું હતું.
જાહેરમાં બેદરકારીનો નમૂનો
આ ચોંકાવનારી ઘટના શિવગંજ-પાલડી વિસ્તારના એક પેટ્રોલ પંપ પર બની હતી. વીડિયોમાં જોઈ શકાય છે કે યુવક કોઈ પણ ડર વગર સીધું જ નોઝલ વડે ગાડી પર ડીઝલનો છંટકાવ કરી રહ્યો છે. ત્યાંથી પસાર થતા એક રાહદારીએ આ આખી ઘટના મોબાઈલમાં કેદ કરી લીધી હતી. વીડિયો સોશિયલ મીડિયા પર આવતાની સાથે જ લોકોએ ઈંધણના ભાવ અને સુરક્ષાના મુદ્દે યુવકની આકરી ટીકા કરી હતી. સ્થાનિક લોકોએ આને માનવ જીવન સાથે રમત ગણાવી હતી.
પોલીસની કડક કાર્યવાહી
વીડિયો પોલીસના ધ્યાને આવતા જ સિરોહી પોલીસે તાત્કાલિક તપાસના ચક્ર ગતિમાન કર્યા હતા. પોલીસે જાહેર વ્યવસ્થાને જોખમમાં મૂકવા બદલ છિબા ગામના મહિપાલ સિંહ અને તેના સાથીદારની ધરપકડ કરી છે. આ સાથે જ સ્ટંટમાં વપરાયેલી સ્કોર્પિયો ગાડી પણ કાયદેસરની કાર્યવાહી હેઠળ જપ્ત કરવામાં આવી છે. પોલીસના જણાવ્યા અનુસાર, આ બધું માત્ર સોશિયલ મીડિયા પર લાઈક્સ અને ફોલોઅર્સ મેળવવા માટે કરવામાં આવ્યું હોય તેમ જણાય છે.
સોશિયલ મીડિયા યુઝર્સને ચેતવણી
અધિકારીઓએ આ મામલે કડક ચેતવણી આપતા જણાવ્યું હતું કે, આવી વર્તણૂક સમાજમાં ખોટો સંદેશ મોકલે છે અને બીજાના જીવને પણ જોખમમાં મૂકે છે. પેટ્રોલ પંપ પર જ્વલનશીલ પદાર્થો સાથે આવી રમત કરવી એ કાયદાકીય રીતે ગંભીર ગુનો છે. પોલીસે સ્પષ્ટ કર્યું છે કે ભવિષ્યમાં પણ જો કોઈ વ્યક્તિ આ પ્રકારે જોખમી સ્ટંટ કરીને વીડિયો બનાવશે, તો તેમની સામે દાખલારૂપ કાર્યવાહી કરવામાં આવશે.
રાજસ્થાનની આ ઘટનાએ ફરી એકવાર સાબિત કર્યું છે કે ડિજિટલ દુનિયામાં 'ફેમસ' થવાની ઘેલછા ક્યારેક જેલની હવા પણ ખવડાવી શકે છે.