મુંબઈ: આજે ભારતીય શેરબજારમાં ભારે ઉથલપાથલ જોવા મળી હતી. અમેરિકા અને ઈરાન વચ્ચેના યુદ્ધની સ્થિતિ અને અમેરિકન રાષ્ટ્રપતિ ડોનાલ્ડ ટ્રમ્પના આકરા નિવેદન બાદ સવારે ખુલતાની સાથે જ સેન્સેક્સ ૧૫૦૦ પોઈન્ટથી વધુ અને નિફ્ટી ૫૦૦ પોઈન્ટ જેટલા ગગડી ગયા હતા. જોકે, બપોર પછી બજારમાં શાનદાર રિકવરી આવતા બંને ઇન્ડેક્સ પોતાના તમામ નુકસાનની ભરપાઈ કરીને દિવસના અંતે બપોરે ૩.૩૦ વાગ્યે સુધારા સાથે ગ્રીન ઝોનમાં બંધ રહ્યા હતા.

 

આજ રોજ મુંબઈ શેરબજાર (બીએસઈ) અને નેશનલ સ્ટોક એક્સચેન્જ (એનએસઈ) માં એક ઐતિહાસિક ઉતાર-ચઢાવ જોવા મળ્યો હતો. રોકાણકારોના શ્વાસ અધ્ધર કરી દે તેવા આજના ટ્રેડિંગ સેશનમાં સવારે બજારમાં બ્લડ બાથ સર્જાયો હતો, પરંતુ બપોર બાદ અચાનક આવેલી ખરીદીએ બજારનો આખો રંગ બદલી નાખ્યો હતો.

 

છેલ્લી સ્થિતિ અને આંકડાકીય માહિતી

 

સેન્સેક્સ આજે સવારે ભારે કડાકા સાથે ખુલ્યા બાદ સેન્સેક્સ દિવસ દરમિયાન ૭૧,૫૪૬ ની નીચલી સપાટીએ (અંદાજે ૧૫૦૦ પોઈન્ટ ડાઉન) પહોંચી ગયો હતો. જોકે, નીચલા મથાળેથી શાનદાર રિકવરી નોંધાવીને બપોરે ૩.૩૦ વાગ્યે સેન્સેક્સ ૧૮૫.૨૩ પોઈન્ટ (૦.૨૫%)ના સુધારા સાથે ૭૩,૩૧૯.૫૫ ની સપાટી પર બંધ રહ્યો હતો.

 

 નિફ્ટી ૫૦: નિફ્ટી ઇન્ડેક્સ પણ સવારે ૫૦૦ પોઈન્ટ જેટલો તૂટીને ૨૨,૧૮૨ ના લેવલ પર પહોંચી ગયો હતો. પરંતુ, તેમાં પણ બપોર બાદ જોરદાર ઉછાળો આવતા નિફ્ટી ૩૩.૭૦ પોઈન્ટ (૦.૧૫%) ના વધારા સાથે ૨૨,૭૧૩.૧૦ ની સપાટી પર સકારાત્મક બંધ રહ્યો હતો.

 

બજારમાં સવારે કડાકો કેમ બોલ્યો? (ડાઉન થવાના કારણો):

 

૧. અમેરિકા-ઈરાન યુદ્ધની ભીતિ: અમેરિકન રાષ્ટ્રપતિ ડોનાલ્ડ ટ્રમ્પે પોતાના સંબોધનમાં ઈરાન પર હજુ આગામી બે-ત્રણ અઠવાડિયા સુધી અત્યંત આકરા હુમલાઓ ચાલુ રાખવાની ચીમકી આપી અને સ્ટ્રેટ ઓફ હોર્મુઝ અંગે કોઈ સ્પષ્ટતા ન થતાં વૈશ્વિક બજારોમાં ગભરાટ ફેલાયો હતો.

 

૨. ક્રૂડ ઓઇલમાં ભડકો: મિડલ ઈસ્ટમાં તણાવ વધતા ગ્લોબલ માર્કેટમાં બ્રેન્ટ ક્રૂડ ઓઇલનો ભાવ ૪% ઉછળીને ૧૦૫ ડોલર પ્રતિ બેરલને પાર કરી ગયો હતો. ભારત ક્રૂડ ઓઈલની મોટી આયાત કરતું હોવાથી તેની સીધી નકારાત્મક અસર બજારો પર પડી હતી.

 

૩. વિદેશી રોકાણકારોની વેચવાલી: એશિયન બજારોમાં કડાકા અને ડોલર મજબૂત થતા વિદેશી સંસ્થાકીય રોકાણકારો (એફ આઈ આઈ) દ્વારા ભારતીય બજારમાંથી સતત મોટા પાયે ભંડોળ પાછું ખેંચવામાં આવી રહ્યું છે.

 

બજારમાં અચાનક રિકવરી કેમ આવી? (સુધરવાના કારણો):

 

૧. ટેકનિકલ શોર્ટ-કવરિંગ અને નીચા મથાળે ખરીદી: સવારે બજાર ખૂબ જ નીચલા સ્તરે (ઓવરસોલ્ડ ઝોનમાં) જતું રહ્યું હતું. નિફ્ટી તેના મહત્વના સપોર્ટ લેવલ પાસે પહોંચતા જ ડોમેસ્ટિક ઇન્સ્ટિટ્યૂશન્સ અને રોકાણકારોએ નીચા ભાવે સારા શેરોમાં (બાર્ગેન હન્ટિંગ) ધૂમ ખરીદી કાઢી હતી.

 

૨. રૂપિયાને બચાવવા આરબીઆઈ ના પગલાં: રિઝર્વ બેંક ઓફ ઈન્ડિયા (આરબીઆઈ) દ્વારા રૂપિયાને ગગડતો અટકાવવા માટે સમયસર લેવાયેલા પગલાંથી આજે રૂપિયો ડોલર સામે ૧૩૦ પૈસા જેટલો મજબૂત થઈને ખુલ્યો હતો, જેણે બજારના સેન્ટિમેન્ટને સુધારવામાં અને રિકવરીમાં મોટી ભૂમિકા ભજવી હતી.

 

આમ, એક જ દિવસમાં રોકાણકારોએ ગભરાટ અને ત્યારબાદ મોટી રાહતનો અનુભવ કર્યો હતો.