મુંબઈ:મહારાષ્ટ્ર સરકાર દ્વારા મુંબઈના વહીવટી તંત્રમાં એક ઐતિહાસિક નિર્ણય લેવામાં આવ્યો છે. બૃહદમુંબઈ મહાનગરપાલિકા (BMC) ના નવા મ્યુનિસિપલ કમિશનર તરીકે IAS અધિકારી અશ્વિની ભિડેની નિમણૂંક કરવામાં આવી છે. આ સાથે જ તેઓ બીએમસીના ઈતિહાસમાં કમિશનર પદ સંભાળનારા પ્રથમ મહિલા અધિકારી બન્યા છે. હાલમાં મુખ્યમંત્રી કાર્યાલયમાં એડિશનલ ચીફ સેક્રેટરી તરીકે ફરજ બજાવતા અશ્વિની ભિડે વર્તમાન કમિશનર ભૂષણ ગગરાણીનો કાર્યકાળ 31 માર્ચ, 2026 ના રોજ પૂર્ણ થયા બાદ પદભાર સંભાળશે.

અનુભવી વહીવટકર્તાની પસંદગી:
1995 બેચના આઈએએસ અધિકારી અશ્વિની ભિડે પોતાની કડક વહીવટી શિસ્ત અને પરિણામલક્ષી કાર્યશૈલી માટે જાણીતા છે. અગાઉ તેમણે મુંબઈ મેટ્રોના વિસ્તરણ અને જટિલ અંડરગ્રાઉન્ડ ઈન્ફ્રાસ્ટ્રક્ચર પ્રોજેક્ટ્સમાં મહત્વની ભૂમિકા ભજવી છે. બીએમસીમાં અગાઉ એડિશનલ મ્યુનિસિપલ કમિશનર તરીકે કામ કરી ચૂકેલા હોવાથી તેઓ સંસ્થાના કાર્યકાજથી પણ પરિચિત છે. સરકારના આ નિર્ણય પાછળ નાગરિક પ્રોજેક્ટ્સને ઝડપી બનાવવા અને વહીવટી નિયંત્રણ મજબૂત કરવાનો હેતુ હોવાનું મનાય છે. તેઓ વર્ષ 2030 સુધી આ પદ પર કાર્યરત રહેશે.

રેસમાં અન્ય દિગ્ગજ અધિકારીઓ પણ હતા:
આ મહત્વના પદ માટે સંજય મુખર્જી અને અસીમ ગુપ્તા જેવા વરિષ્ઠ અધિકારીઓના નામની પણ ચર્ચા વિચારણા કરવામાં આવી હતી. સંજય મુખર્જી હાલમાં MMRDA ના મેટ્રોપોલિટન કમિશનર છે અને 'ઈન્ફ્રાસ્ટ્રક્ચર મેન' તરીકે ઓળખાય છે, જ્યારે અસીમ ગુપ્તા ડેપ્યુટી સીએમ એકનાથ શિંદેના એડિશનલ ચીફ સેક્રેટરી તરીકે સેવા આપી રહ્યા છે. જોકે, અંતે અશ્વિની ભિડેના અનુભવ અને ટ્રેક રેકોર્ડને પ્રાધાન્ય આપવામાં આવ્યું છે.

મહારાષ્ટ્રમાં મહિલા શક્તિનો ઉદય:
મહાયુતિ સરકાર દ્વારા છેલ્લા કેટલાક સમયથી વહીવટી તંત્રના ટોચના પદો પર મહિલાઓની નિમણૂંક કરવાનું વલણ જોવા મળ્યું છે. આ અગાઉ રશ્મિ શુક્લા રાજ્યના પ્રથમ મહિલા ડાયરેક્ટર જનરલ ઓફ પોલીસ (DGP) બન્યા હતા અને સુજાતા સૌનિકે મહારાષ્ટ્રના પ્રથમ મહિલા મુખ્ય સચિવ તરીકે સેવા આપી હતી. હવે અશ્વિની ભિડેની નિમણૂંક સાથે મુંબઈના નગર પ્રશાસનની કમાન પણ પ્રથમવાર મહિલાના હાથમાં સોંપવામાં આવી છે. નવી જવાબદારી હેઠળ તેઓ ઈન્ફ્રાસ્ટ્રક્ચર, સ્વચ્છતા, ટ્રાફિક સિસ્ટમ અને શહેરી શાસન જેવા મહત્વના ક્ષેત્રોનું નિરીક્ષણ કરશે.