નવી દિલ્હી : રાષ્ટ્રીય રાજધાની દિલ્હી અને તેની આસપાસના વિસ્તારો (NCR) માં સોમવારે હવામાનમાં અચાનક પલટો આવ્યો છે. છેલ્લા કેટલાક દિવસોથી વધી રહેલા તાપમાન વચ્ચે આજે સાંજે પડેલા ભારે વરસાદે દિલ્હીવાસીઓને મોટી રાહત આપી છે. ભારતીય હવામાન વિભાગ (IMD) દ્વારા અગાઉ જારી કરાયેલા 'યલો એલર્ટ' ને હવે વધારીને 'ઓરેન્જ એલર્ટ' કરી દેવામાં આવ્યું છે, જે સૂચવે છે કે આગામી કલાકોમાં ૫૦ થી ૭૦ કિમી પ્રતિ કલાકની ઝડપે પવન ફૂંકાવા સાથે મધ્યમ વરસાદ પડી શકે છે.
ગરમી ગઈ ને ઠંડક આવી
હવામાન વિભાગના આંકડા મુજબ, દિલ્હીમાં આજે મહત્તમ તાપમાન ૩૧ ડિગ્રી સેલ્સિયસ અને લઘુત્તમ તાપમાન ૨૧ ડિગ્રી સેલ્સિયસ નોંધાયું છે. વરસાદને કારણે તાપમાનમાં નોંધપાત્ર ઘટાડો થયો છે, જેનાથી કાળઝાળ ગરમીનો સામનો કરી રહેલા લોકોને મોટી આશ્વાસન મળ્યું છે. માત્ર ગરમી જ નહીં, પરંતુ વરસાદને કારણે પ્રદૂષણના સ્તરમાં પણ ઘટાડો થયો છે અને એર ક્વોલિટી ઇન્ડેક્સ (AQI) સુધર્યો છે, જે દિલ્હીના સ્વાસ્થ્ય માટે સારા સંકેત છે.
વરસાદ સાથે મુશ્કેલી પણ આવી
જોકે, આ આહલાદક હવામાન પોતાની સાથે કેટલીક સમસ્યાઓ પણ લઈને આવ્યું છે. દિલ્હીના નીચાણવાળા વિસ્તારોમાં પાણી ભરાઈ જવાના અહેવાલો મળ્યા છે, જેના કારણે મુખ્ય માર્ગો પર ટ્રાફિકની ગતિ ધીમી પડી ગઈ છે. વાવાઝોડા અને તેજ પવનને કારણે વાહન ચાલકોને ભારે મુશ્કેલીનો સામનો કરવો પડી રહ્યો છે. હવામાન વિભાગે રહેવાસીઓને સાવચેત રહેવા અને વીજળીના કડાકા વખતે સુરક્ષિત સ્થાને રહેવાની સલાહ આપી છે.
આગામી દિવસોમાં પણ મેઘમહેર યથાવત રહેશે
હવામાન વિભાગની આગાહી મુજબ, મંગળવારે પણ દિલ્હીમાં ગાજવીજ સાથે હળવો વરસાદ ચાલુ રહી શકે છે. રવિવારે જારી કરાયેલી એડવાઈઝરી મુજબ, માત્ર દિલ્હી જ નહીં પણ ભારતના અનેક ભાગોમાં વેસ્ટર્ન ડિસ્ટર્બન્સને કારણે હવામાનમાં આ પ્રકારનો ફેરફાર જોવા મળી રહ્યો છે. દિલ્હીવાસીઓ માટે આ વરસાદ ઉનાળાની શરૂઆત પહેલાની એક મોટી ભેટ સમાન સાબિત થયો છે.