એથેન્સ: તા.27: યુરોપના દેશ ગ્રીસે આંતરરાષ્ટ્રીય સ્તરે ચાલી રહેલા યુદ્ધના તણાવ અને વધતી જતી મોંઘવારી વચ્ચે પોતાના નાગરિકોને મોટી રાહત આપી છે. વડાપ્રધાન કિરિયાકોસ મિત્સોટાકિસની સરકારે જાહેરાત કરી છે કે 1 એપ્રિલથી દેશના કુલ માસિક લઘુત્તમ વેતનમાં 4.5% નો વધારો કરવામાં આવશે. આ નિર્ણય સાથે હવે લઘુત્તમ પગાર 880 યુરોથી વધીને 920 યુરો (આશરે ₹83,000) થઈ જશે.
યુદ્ધ અને ઉર્જા સંકટની અસર
હાલમાં મધ્ય પૂર્વમાં ઈરાન, અમેરિકા અને ઈઝરાયલ વચ્ચે ચાલી રહેલા સંઘર્ષને કારણે વૈશ્વિક સ્તરે ઉર્જા અને ઇંધણના ભાવમાં ઉછાળો આવ્યો છે. ગ્રીસ હજુ પણ 2009-2018ના દેવા સંકટની અસરોમાંથી બહાર આવી રહ્યું છે, ત્યારે આ યુદ્ધે નવી આર્થિક ચિંતાઓ જન્માવી છે. મોંઘવારીના મારથી સામાન્ય જનતાને બચાવવા માટે સરકારે માત્ર વેતન વધારો જ નહીં, પરંતુ ઈંધણ, ખાતર અને ફેરી ટિકિટ પર સબસિડીની પણ જાહેરાત કરી છે.
ચાર વર્ષમાં છઠ્ઠી વખત વધારો
ગ્રીસ સરકારનું લક્ષ્ય 2027 સુધીમાં લઘુત્તમ માસિક પગારને 950 યુરો સુધી લઈ જવાનું છે. 2022 થી અત્યાર સુધીમાં સરકારે પાંચ વખત ટેક્સમાં ઘટાડો કર્યો છે અને પાંચ વખત પગારમાં વધારો કર્યો છે. વડાપ્રધાને કેબિનેટ બેઠકમાં જણાવ્યું હતું કે, "લોકોને વધુ આર્થિક ટેકો આપવા અને તેમનું જીવનધોરણ સુધારવા માટે અમે આ ઐતિહાસિક નિર્ણય લઈ રહ્યા છીએ."
ખરીદ શક્તિ વધારવા પર ભાર
ગ્રીસમાં ખરીદ શક્તિ હજુ પણ અન્ય યુરોપિયન દેશોની સરેરાશ કરતા ઓછી છે. દેવા સંકટ દરમિયાન ગ્રીસના ઉત્પાદનનો ચોથો ભાગ નાશ પામ્યો હતો અને લોકોના પેન્શન તથા વેતનમાં કાપ મૂકવામાં આવ્યો હતો. હવે સરકાર તે જૂના દિવસોની નુકસાની ભરપાઈ કરવા માંગે છે. આ માટે સુપરમાર્કેટના માલસામાન પર નફાના માર્જિનની મર્યાદા પણ નક્કી કરવામાં આવી છે જેથી વેપારીઓ ગ્રાહકો પાસેથી વધુ પૈસા ન વસૂલી શકે.
આ નવા પગલાથી ગ્રીસના અર્થતંત્રમાં નવી રોનક આવવાની અને સામાન્ય મધ્યમ વર્ગના પરિવારોને મોટી આર્થિક હૂંફ મળવાની અપેક્ષા છે.