વોશિંગ્ટન: ઈરાન અને ઈઝરાયલ વચ્ચે ચાલી રહેલા ભયાનક યુદ્ધને ત્રણ અઠવાડિયા વીતી ગયા છે, પરંતુ શાંતિના કોઈ એંધાણ દેખાવાને બદલે સંકટ વધુ ઘેરું બની રહ્યું છે. અમેરિકી રાષ્ટ્રપતિ ડોનાલ્ડ ટ્રમ્પે કોંગ્રેસની મંજૂરી વિના જ અમેરિકાને આ યુદ્ધમાં ધકેલી દીધું હોવાના આક્ષેપો સાથે હવે વ્હાઇટ હાઉસની અંદર જ વિરોધ શરૂ થયો છે. અમેરિકી કાયદા નિર્માતાઓ હવે ટ્રમ્પ વહીવટીતંત્ર પાસે જવાબ માંગી રહ્યા છે કે આ યુદ્ધનો અંતિમ ઉદ્દેશ્ય શું છે અને અમેરિકાએ આ માટે હજુ કેટલું નુકસાન વેઠવું પડશે?
પેન્ટાગોનનું ૨૦૦ અબજ ડોલરનું તોતિંગ બજેટ
યુદ્ધના મેદાનમાં વધી રહેલા ખર્ચને પહોંચી વળવા માટે પેન્ટાગોને વધારાના ૨૦૦ અબજ ડોલરની વિનંતી કરી છે. આ જંગી રકમની માંગણીએ અમેરિકાના અર્થતંત્રમાં ચિંતા જગાવી છે. અત્યાર સુધીના આક્રમણમાં ૧૩ અમેરિકી સૈનિકોએ જીવ ગુમાવ્યા છે અને ૨૩૦થી વધુ જવાનો ઘાયલ થયા છે. સાથોસાથ, પશ્ચિમ એશિયામાં હજારો સૈનિકોની તૈનાતી અને તેલના ભાવમાં થયેલા તોતિંગ વધારાને કારણે સામાન્ય અમેરિકી નાગરિકો પર પણ આર્થિક બોજ વધી રહ્યો છે.
શું મિશન પૂર્ણ થવાને આરે છે?
ઉત્તર કેરોલિનાના રિપબ્લિકન સેનેટર થોમ ટિલિસે આક્રમક સવાલ ઉઠાવતા કહ્યું છે કે, "આપણે આખરે શું પ્રાપ્ત કરવા માંગીએ છીએ તે સ્પષ્ટ થવું જોઈએ." બીજી તરફ, વધતા દબાણ વચ્ચે રાષ્ટ્રપતિ ટ્રમ્પે શુક્રવારે મોડી રાત્રે સંકેત આપ્યો હતો કે તેઓ લશ્કરી કાર્યવાહીનો 'અંત' લાવવા અંગે વિચારી રહ્યા છે. હાઉસ સ્પીકર માઇક જોહ્ન્સને પણ સમર્થન આપતા જણાવ્યું કે મૂળ મિશન લગભગ પૂર્ણ થઈ ગયું છે અને ટૂંક સમયમાં યુદ્ધ વિરામ જેવી સ્થિતિ સર્જાઈ શકે છે.
વૈશ્વિક અર્થતંત્ર પર યુદ્ધની કાળી છાયા
આ યુદ્ધ હવે માત્ર બે દેશો પૂરતું મર્યાદિત ન રહેતા સમગ્ર ખાડી દેશોમાં ફેલાઈ ગયું છે. સાથી દેશો પર થઈ રહેલા વળતા હુમલા અને ઉર્જા સંકટને કારણે વિશ્વભરના શેરબજારોમાં ગાબડાં પડ્યા છે. ટ્રમ્પ ભલે યુદ્ધ સમાપ્ત કરવાની વાત કરી રહ્યા હોય, પરંતુ જમીની હકીકત એ છે કે ઈરાન હજુ પણ જોરદાર વળતો જવાબ આપી રહ્યું છે. હવે જોવાનું એ રહેશે કે આગામી દિવસોમાં વોશિંગ્ટન કઈ નવી રણનીતિ સાથે આ વૈશ્વિક સંકટમાંથી બહાર નીકળે છે.