તેલ અવીવ: મધ્ય પૂર્વમાં ચાલી રહેલું ઈરાન યુદ્ધ હવે તેના સૌથી નિર્ણાયક અને ભયાનક તબક્કામાં પહોંચી ગયું હોય તેમ લાગે છે. ઈઝરાયલના સંરક્ષણ મંત્રી ઈઝરાયલ કાત્ઝે શનિવારે એક વીડિયો નિવેદન જારી કરીને દુનિયાભરમાં ફફડાટ ફેલાવી દીધો છે. તેમણે સ્પષ્ટ શબ્દોમાં ચેતવણી આપી છે કે, આગામી અઠવાડિયું ઈરાન માટે ભારે સાબિત થશે, કારણ કે ઈઝરાયલી સંરક્ષણ દળો (IDF) અને અમેરિકી સેના સંયુક્ત રીતે ઈરાનના વ્યૂહાત્મક ઠેકાણાઓ પર હુમલાની તીવ્રતામાં ધરખમ વધારો કરવા જઈ રહી છે.
ટ્રમ્પના મિશ્ર સંકેતો અને ઈઝરાયલનો આક્રમક મૂડ
રસપ્રદ વાત એ છે કે, આ ચેતવણી એવા સમયે આવી છે જ્યારે અમેરિકી રાષ્ટ્રપતિ ડોનાલ્ડ ટ્રમ્પે મધ્ય પૂર્વમાં લશ્કરી કાર્યવાહી ધીમે ધીમે ઘટાડવાની વાત કરી હતી. જોકે, બીજી તરફ અમેરિકાએ આ પ્રદેશમાં વધુ યુદ્ધ જહાજો અને મરીન સૈનિકો તૈનાત કરવાની પણ જાહેરાત કરી છે. અમેરિકા તરફથી મળી રહેલા આ મિશ્ર સંકેતો વચ્ચે ઈઝરાયલે પોતાનો ઈરાદો સાફ કરી દીધો છે કે તે ઈરાનને માથું ઊંચકવાનો કોઈ મોકો આપવા માંગતું નથી.
યુદ્ધનો ભયાનક આંકડો: હજારો સૈનિકોના મોત
૨૨ દિવસથી ચાલી રહેલા આ લોહીયાળ સંઘર્ષમાં અત્યાર સુધીમાં ઈરાનના ૧,૩૦૦ થી વધુ સૈનિકો અને લેબનોનમાં ૧,૦૦૦ થી વધુ લોકો માર્યા ગયા છે. ઈઝરાયલે પણ પોતાના ૧૫ જવાનો ગુમાવ્યા છે, જ્યારે આ પ્રદેશમાં ૧૩ અમેરિકન સૈનિકોના મોત થયા છે. ઈરાન સતત મિસાઈલ હુમલા કરી રહ્યું છે, જેના જવાબમાં સાઉદી અરેબિયાએ પણ પોતાના પૂર્વ ભાગમાં ૨૦ જેટલા ડ્રોન તોડી પાડ્યા હોવાના અહેવાલ છે. આ લડાઈને કારણે લેબનોન અને ઈરાનમાં લાખો લોકો બેઘર બન્યા છે.
વૈશ્વિક બજાર અને તેલના ભાવમાં ભડકો
આ યુદ્ધની અસર માત્ર સરહદો સુધી સીમિત નથી રહી, પણ વૈશ્વિક અર્થતંત્ર પર પણ તેની માઠી અસર પડી રહી છે. તેલના ભાવમાં થયેલા તોતિંગ વધારાને કારણે અમેરિકી શેરબજારમાં કડાકો જોવા મળ્યો છે. ટ્રમ્પ વહીવટીતંત્રે મોંઘવારીને ડામવા માટે ઈરાની તેલ વહન કરતા જહાજો પરના પ્રતિબંધો હટાવવાની હિલચાલ કરી છે, પરંતુ યુદ્ધના મેદાનમાં હજુ શાંતિના કોઈ એંધાણ દેખાતા નથી. ઈરાને વળતો પ્રહાર કરતા દુનિયાભરના પર્યટન સ્થળોને નિશાન બનાવવાની ધમકી આપી છે, જેનાથી સમગ્ર વિશ્વમાં એલર્ટ જાહેર કરવામાં આવ્યું છે.