ઓઝોરો (નાઈજીરીયા): નાઈજીરીયાના ડેલ્ટા રાજ્યના ઓઝોરોમાં એક હચમચાવી દે તેવી ઘટના સામે આવી છે, જ્યાં સ્થાનિક ઉત્સવના નામે મહિલાઓની ગરિમાને જાહેરમાં લૂંટવામાં આવી હતી. આ અમાનવીય કૃત્યમાં સંડોવાયેલા સમુદાયના વડા અને મુખ્ય આયોજક સહિત પાંચ શંકાસ્પદોની પોલીસે ધરપકડ કરી છે. આ ઘટનાને સ્થાનિક સ્તરે 'બળાત્કાર મહોત્સવ' (R@p!ng Festival) તરીકે વર્ણવવામાં આવતા સમગ્ર વિશ્વમાં ફિટકારની લાગણી જન્મી છે.
રક્ષક જ બન્યા ભક્ષક
ડેલ્ટા રાજ્ય પોલીસ કમાન્ડના જણાવ્યા અનુસાર, ધરપકડ કરાયેલા લોકોમાં ઓરામુડુ ક્વાર્ટર્સના સમુદાયના વડા ચીફ ઓમોરેડે સન્ડે અને અન્ય ચાર સાગરીતોનો સમાવેશ થાય છે. આ લોકો પર આરોપ છે કે તેમણે ઉત્સવના નામે ભીડ ભેગી કરી અને રક્ષણ આપવાને બદલે મહિલાઓ પર જાતીય હુમલાઓ કર્યા હતા. પોલીસ પીઆરઓ બ્રાઇટ એડાફે જણાવ્યું હતું કે તમામ શંકાસ્પદોને તાત્કાલિક અસરથી રાજ્ય સીઆઈડી (CID) માં ટ્રાન્સફર કરવામાં આવ્યા છે.
વાયરલ વીડિયોએ ખોલી પોલ
આ શરમજનક ઘટના ત્યારે પ્રકાશમાં આવી જ્યારે સોશિયલ મીડિયા પ્લેટફોર્મ X પર એક અત્યંત ખલેલ પહોંચાડતો વીડિયો વાયરલ થયો. આ વીડિયોમાં પુરુષોનું એક જૂથ જાહેરમાં એક લાચાર મહિલા પર જાતીય હુમલો કરતું જોવા મળ્યું હતું. આ વીડિયો જોયા બાદ લોકોમાં ભારે આક્રોશ ફાટી નીકળ્યો હતો, જેના પગલે ઉચ્ચ પોલીસ અધિકારીઓએ કડક કાર્યવાહીના આદેશ આપ્યા હતા. પીડિત મહિલાઓની સુરક્ષા અને ઓળખ જાળવી રાખવા માટે વીડિયોને જાહેર પ્લેટફોર્મ પરથી હટાવવા માટે પણ સૂચના અપાઈ છે.
અનેક મહિલાઓ બની શિકાર
પ્રાથમિક અહેવાલો મુજબ, ગુરુવારે યોજાયેલા આ કહેવાતા તહેવાર દરમિયાન ઘરની બહાર નીકળેલી અનેક મહિલાઓને નિશાન બનાવવામાં આવી હતી. અનેક મહિલાઓની જાતીય સતામણી કરવામાં આવી હોવાના અને કેટલીક પીડિતાઓ પર સામૂહિક બળાત્કાર થયો હોવાના ગંભીર દાવાઓ કરવામાં આવી રહ્યા છે. પોલીસ આ તમામ પાસાઓની ગંભીરતાથી તપાસ કરી રહી છે અને ખાતરી આપી છે કે આ પાપમાં સંડોવાયેલા કોઈ પણ વ્યક્તિને છોડવામાં આવશે નહીં.