નવી દિલ્હી: ભારતની આંતરિક બાબતોમાં દખલગીરી કરવાના અમેરિકાના પ્રયાસો સામે દેશના ટોચના બૌદ્ધિકોએ મોરચો માંડ્યો છે. યુનાઇટેડ સ્ટેટ્સ કમિશન ઓન ઇન્ટરનેશનલ રિલિજિયસ ફ્રીડમ (USCIRF) દ્વારા રાષ્ટ્રીય સ્વયંસેવક સંઘ (RSS) પર પ્રતિબંધ મૂકવાની ભલામણ કરતા અહેવાલને ભારતના 275 થી વધુ ભૂતપૂર્વ ન્યાયાધીશો, સનદી અધિકારીઓ અને સૈન્યના ઉચ્ચ અધિકારીઓએ સખત શબ્દોમાં વખોડી કાઢ્યો છે. આ નિવેદનમાં અમેરિકી રિપોર્ટને 'બૌદ્ધિક નાદારી' અને 'વાહિયાત વિચારસરણી'નું પરિણામ ગણાવવામાં આવ્યું છે.
પક્ષપાતી એજન્ડાનો પર્દાફાશ
શનિવારે જારી કરાયેલા એક સંયુક્ત નિવેદનમાં આ મહાનુભાવોએ આક્ષેપ કર્યો હતો કે USCIRF નો અહેવાલ સંપૂર્ણપણે પૂર્વગ્રહયુક્ત અને પાયાવિહોણો છે. તેમણે અમેરિકી સરકારને વિનંતી કરી છે કે આ રિપોર્ટ તૈયાર કરનારા વ્યક્તિઓની કડક પૃષ્ઠભૂમિ તપાસ કરવામાં આવે. નિવેદનમાં સ્પષ્ટપણે કહેવામાં આવ્યું છે કે આ અહેવાલ પાછળ ભારતની છબી ખરાબ કરવાનો અને ભારતીય નાગરિકોની ગતિવિધિઓ પર અંકુશ લાવવાનો છૂપો એજન્ડા રહેલો છે.
અમેરિકી કરદાતાઓના નાણાંનો દુરુપયોગ
ભારતના પૂર્વ ન્યાયાધીશો અને અધિકારીઓએ અમેરિકાના નાગરિકોને પણ ચેતવ્યા છે. તેમણે જણાવ્યું કે, "આ અમેરિકન કરદાતાઓ માટે આંખ ખોલનારી બાબત છે. જેમના ટેક્સના નાણાંનો ઉપયોગ USCIRF જેવી સંસ્થાઓ ભારત વિરોધી હિતોના એજન્ડાને આગળ વધારવા માટે કરી રહી છે." નિવેદનમાં વધુમાં ઉમેર્યું છે કે RSS જેવી સામાજિક-સાંસ્કૃતિક સંસ્થાઓને કોઈપણ નક્કર પુરાવા વિના નકારાત્મક રીતે ચિત્રિત કરવી એ આ સંસ્થાની જૂની આદત બની ગઈ છે.
પુરાવા વગરના આક્ષેપો સામે લાલ આંખ
નિવેદન પર હસ્તાક્ષર કરનારાઓએ ચિંતા વ્યક્ત કરી છે કે USCIRF વારંવાર ભારતીય સરકારી સંસ્થાઓ અને સામાજિક સંગઠનોને યોગ્ય સંદર્ભ વિના વિશ્વ સમક્ષ ખોટી રીતે રજૂ કરે છે. કોઈપણ મોટા પાયે પુરાવા વિના લાદવામાં આવેલા આ આક્ષેપો માત્ર ભારતની લોકશાહી અને સાર્વભૌમત્વને ઠેસ પહોંચાડવાનો નિષ્ફળ પ્રયાસ છે. આ નિવેદન બાદ હવે આંતરરાષ્ટ્રીય સ્તરે ભારત વિરોધી લોબીને જડબાતોડ જવાબ મળ્યો હોવાનું મનાય છે.