તેલ અવીવ: ઇઝરાયલી વડાપ્રધાન બેન્જામિન નેતન્યાહૂએ ગુરુવારે રાત્રે આપેલા એક ટેલિવિઝન સંબોધને વિશ્વભરમાં રાજદ્વારી અને ધાર્મિક વિવાદ છેડી દીધો છે. નેતન્યાહૂએ પોતાના ભાષણમાં ઈસુ ખ્રિસ્ત અને ક્રૂર મંગોલ શાસક ચંગીઝ ખાનની તુલના કરતા કહ્યું કે, ઈતિહાસ સાબિત કરે છે કે ઈસુ ખ્રિસ્તનો ચંગીઝ ખાન પર કોઈ ફાયદો નથી. જો તમે પૂરતા મજબૂત અને ક્રૂર હોવ, તો દુષ્ટતા હંમેશા સારા પર વિજય મેળવે છે. આ નિવેદનની ટીકા થતા તેમણે સ્પષ્ટતા કરી હતી કે તેઓ માત્ર ઈતિહાસકાર વિલ ડ્યુરાન્ટને ટાંકી રહ્યા હતા અને તેમનો હેતુ કોઈનું અપમાન કરવાનો નહોતો.

'હું જીવિત છું' - અફવાઓનો અંત

યુદ્ધની શરૂઆતથી જ નેતન્યાહૂના સ્વાસ્થ્ય અને અસ્તિત્વને લઈને અનેક અટકળો ચાલી રહી હતી. સોશિયલ મીડિયા પર તેમના કેટલાક વીડિયોને 'AI-જનરેટેડ' ગણાવવામાં આવ્યા હતા. આ બધી અફવાઓને ફગાવતા નેતન્યાહૂએ સંબોધનની શરૂઆતમાં જ કહ્યું, "હું જીવિત છું અને તમે બધા તેના સાક્ષી છો." તેમણે એક કોફી શોપમાં બેસીને પ્રેસ કોન્ફરન્સ યોજી હતી જેથી દુનિયાને ખાતરી થાય કે તેઓ સુરક્ષિત છે.

ઈરાન સાથેના યુદ્ધ પર મોટું અપડેટ

નેતન્યાહૂએ દાવો કર્યો હતો કે ઇઝરાયલ અત્યારે વિજય તરફ આગળ વધી રહ્યું છે અને ઈરાનનો નાશ થઈ રહ્યો છે. તેમણે જણાવ્યું કે, ઈરાન સાથેનું યુદ્ધ લોકોના વિચાર કરતાં ઘણું ઝડપથી સમાપ્ત થઈ શકે છે. વધુમાં, તેમણે ઈરાનના નવા સર્વોચ્ચ નેતા મોજતબા ખામેની પર કટાક્ષ કરતા કહ્યું કે, તેઓ અત્યારે ક્યાં છે તેની કોઈને ખબર નથી અને તેઓ હજુ સુધી જનતા સામે આવ્યા નથી. નેતન્યાહૂએ સંકેત આપ્યો હતો કે ઈરાનનું નેતૃત્વ અત્યારે સંકટમાં છે.

વૈશ્વિક પ્રતિક્રિયા અને ટીકા

નેતન્યાહૂના 'Might is Right' (જેની લાઠી તેની ભેંસ) વાળા વલણની વૈશ્વિક સ્તરે આકરી ટીકા થઈ રહી છે. દુબઈ સ્થિત ઉદ્યોગસાહસિક મારિયો નૌફલે ટિપ્પણી કરી હતી કે, જ્યારે ઇઝરાયલ પહેલેથી જ વૈશ્વિક સ્તરે છબી સુધારવાની લડાઈ લડી રહ્યું છે, ત્યારે આવા નિવેદનો પરિસ્થિતિને વધુ વણસાવી શકે છે. ટીકાકારોનું કહેવું છે કે પીએમનું આ નિવેદન નૈતિકતાને બદલે માત્ર શક્તિના પ્રદર્શનને જ મહત્વ આપે છે, જે લોકશાહી મૂલ્યોની વિરુદ્ધ છે.