નવી દિલ્હી: મધ્ય પૂર્વના આકાશમાં યુદ્ધના વાદળો ફાટી નીકળ્યા છે. શાંતિના તમામ દાવાઓ અને ઈરાની રાષ્ટ્રપતિ મસૂદ પેઝેશ્કિયાનના વચનોને નેવે મૂકીને, ઈરાને ગલ્ફ દેશો પર ડ્રોન અને બેલિસ્ટિક મિસાઈલોનો વરસાદ વરસાવ્યો છે. આ આક્રમણ એટલું ભીષણ હતું કે દુબઈમાં એક નાગરિકનું મોત નીપજ્યું છે, જ્યારે બહેરીન, સાઉદી અરેબિયા અને કુવૈતના મહત્ત્વના સરકારી તેમજ વ્યાપારી કેન્દ્રોને ગંભીર નુકસાન પહોંચ્યું છે. સાઉદી અરેબિયાના રિયાધમાં ડિપ્લોમેટિક ક્વાર્ટર અને પ્રિન્સ સુલતાન એર બેઝને ટાર્ગેટ કરવામાં આવતા આ સંઘર્ષ હવે વૈશ્વિક સુરક્ષા માટે મોટો ખતરો બની ગયો છે.

સ્થિતિની ગંભીરતા જોઈને UAE ના રાષ્ટ્રપતિ શેખ મોહમ્મદ બિન ઝાયેદ અલ નાહ્યાને સ્પષ્ટ શબ્દોમાં ઈરાનને ચેતવણી આપતા જણાવ્યું છે કે, "UAE ને નબળો દેશ માનવાની ભૂલ ન કરો. અમે સરળ શિકાર નથી, પરંતુ એક મજબૂત રાષ્ટ્ર છીએ જે પોતાની રક્ષા માટે કોઈપણ હદ સુધી જઈ શકે છે." સાઉદી અરેબિયા અને કતારની સંરક્ષણ પ્રણાલીઓએ તેમના હવાઈ ક્ષેત્રમાં ઘૂસેલા અનેક ડ્રોન અને મિસાઈલોને તોડી પાડીને સજ્જતા દર્શાવી છે. કુવૈતના સરકારી મકાનો પર થયેલા હુમલાએ આ ક્ષેત્રમાં અરાજકતા વધારી દીધી છે, જેનાથી સ્પષ્ટ થાય છે કે ઈરાનનું આ આક્રમણ સુનિયોજિત હતું.

આ વિનાશક હુમલાઓના જવાબમાં ઈઝરાયલ અને અમેરિકાએ પણ આક્રમક વલણ અપનાવ્યું છે. તાજેતરના અહેવાલો મુજબ, સંયુક્ત ઓપરેશનમાં ઈરાનના ઈસ્ફહાન પ્રાંતમાં બે મુખ્ય એરબેઝ અને અનેક મહત્ત્વના લશ્કરી ઈંધણ ડેપોને મિસાઈલ હુમલા દ્વારા નેસ્તનાબૂદ કરી દેવામાં આવ્યા છે. ઈરાન દ્વારા કરવામાં આવેલા હુમલા અને તેના વળતા પ્રહારમાં થયેલા નુકસાનથી મધ્ય પૂર્વનું સંતુલન સંપૂર્ણપણે ખોરવાઈ ગયું છે. હાલમાં બંને પક્ષો વચ્ચે છવાયેલો આ તણાવ આગામી દિવસોમાં વધુ મોટા યુદ્ધ તરફ દોરી જશે કે કેમ, તે સમગ્ર વિશ્વ માટે ચિંતાનો વિષય બન્યો છે.