શ્રીનગર:  મધ્ય-પૂર્વમાં છેડાયેલા જંગની અસર હવે કાશ્મીરની ગલીઓમાં પણ જોવા મળી રહી છે. ઈરાન પર ઈઝરાયેલ અને અમેરિકાના સંયુક્ત હુમલાઓ તેમજ આયાતુલ્લાહ અલી ખામેનીના નિધનના સમાચાર બાદ કાશ્મીર ખીણમાં રોષ ફાટી નીકળ્યો છે. પીપલ્સ ડેમોક્રેટિક પાર્ટીના પ્રમુખ અને પૂર્વ મુખ્યમંત્રી મહેબૂબા મુફ્તીએ શ્રીનગરમાં એક વિશાળ વિરોધ પ્રદર્શનનું નેતૃત્વ કર્યું હતું. પ્રદર્શન દરમિયાન મુફ્તીએ અમેરિકી પ્રમુખ ડોનાલ્ડ ટ્રમ્પ અને ઈઝરાયેલના વડાપ્રધાન બેન્જામિન નેતન્યાહૂના પોસ્ટરો સળગાવીને પોતાનો આક્રોશ વ્યક્ત કર્યો હતો. તેમણે સોશિયલ મીડિયા પર અત્યંત કડક શબ્દોમાં લખ્યું કે, તેઓ કયામતના દિવસ સુધી આ ‘દમનકારી શક્તિઓ’ સામે અડગ રહીને વિરોધ કરતા રહેશે.

આ વિરોધ પ્રદર્શન માત્ર નેતાઓ પૂરતું મર્યાદિત રહ્યું નથી, પરંતુ કાશ્મીરના સામાન્ય નાગરિકો પણ તેમાં મોટી સંખ્યામાં જોડાયા હતા. પ્રદર્શનકારીઓએ હાથમાં ખામેનીના પોસ્ટરો પકડ્યા હતા અને અમેરિકા-ઈઝરાયેલ વિરોધી સૂત્રોચ્ચાર કર્યા હતા. રસપ્રદ વાત એ છે કે, આ પોસ્ટરોમાં જેફરી એપ્સ્ટાઇનના ફોટા પણ જોવા મળ્યા હતા, જેના દ્વારા ટ્રમ્પ સામે નિશાન સાધવાનો પ્રયાસ કરાયો હતો. મહેબૂબા મુફ્તીએ આ દરમિયાન સાંસદ આગા રુહુલ્લાહ અને જુનૈદ મટ્ટુ સામે નોંધાયેલી એફઆઈઆર (FIR) ની આકરી નિંદા કરતા તેને ‘અન્યાયી’ ગણાવી હતી. તેમણે સ્પષ્ટ કર્યું કે ભારત સરકાર અને સ્થાનિક વહીવટીતંત્રનું મૌન એનો અર્થ એ નથી કે અન્યાય વિરુદ્ધ અવાજ ઉઠાવનારા લોકો ગુનેગાર છે.

બીજી તરફ, હુર્રિયત નેતા અને મૌલવી મીરવાઇઝ ઉમર ફારૂકે પણ આ મામલે સરકારને ઘેરી છે. તેમણે કહ્યું કે શાંતિપૂર્ણ વિરોધ અને શોક વ્યક્ત કરવો એ લોકતાંત્રિક અધિકાર છે અને આ અધિકારનું સન્માન થવું જોઈએ. મીરવાઇઝે વિરોધ પ્રદર્શન દરમિયાન અટકાયત કરાયેલા મહિલાઓ અને સગીરોની તાત્કાલિક મુક્તિની માંગ કરી છે. તેમણે કાશ્મીરથી લઈને જમ્મુ અને પીર પંજાલ સુધી જોવા મળેલી મુસ્લિમ એકતાની પ્રશંસા કરતા જણાવ્યું કે, આ એકતા દલિતો અને પીડિતો પ્રત્યેની નૈતિક ચેતનાનું પ્રતિક છે. ખીણમાં ઠેર-ઠેર પાળવામાં આવેલો બંધ અને વિરોધ પ્રદર્શનો પર મીડિયા પ્રતિબંધોની ટીકા કરતા તેમણે સત્તાવાળાઓને અભિવ્યક્તિની સ્વતંત્રતા જાળવી રાખવા અપીલ કરી છે.