નવી દિલ્હી: હોળીના તહેવાર પહેલા જ સૂર્યનારાયણે આકરો મિજાજ દેખાડવાનું શરૂ કરી દીધું છે. દેશના મોટાભાગના રાજ્યોમાં અત્યારે તાપમાનમાં સતત વધારો નોંધાઈ રહ્યો છે. હવામાન વિભાગની તાજેતરની આગાહી મુજબ, આગામી અઠવાડિયે ઉત્તર-પશ્ચિમ અને મધ્ય ભારતમાં ગરમીનો પારો સામાન્ય કરતા ૪ થી ૬ ડિગ્રી વધુ રહેવાની શક્યતા છે. જોકે, ઉત્તર ભારતના પહાડી વિસ્તારોમાં હજુ પણ હિમવર્ષાનો દોર ચાલુ રહે તેવા સંકેતો મળી રહ્યા છે.
ગુજરાત અને મહારાષ્ટ્રમાં વધશે શેકાવું
ગુજરાતના દરિયાકાંઠાના વિસ્તારોમાં આગામી ૬ માર્ચ સુધી ગરમીની સાથે ભેજનું પ્રમાણ વધવાને કારણે ભારે ઉકળાટ અનુભવાશે. રાજ્યમાં આગામી બે દિવસમાં તાપમાનમાં ૨ થી ૩ ડિગ્રીનો વધારો થવાની સંભાવના છે. આવી જ સ્થિતિ મહારાષ્ટ્ર અને વિદર્ભમાં પણ જોવા મળશે, જ્યાં ગરમીનો પારો ૪ ડિગ્રી સુધી ઉછળી શકે છે. મધ્ય ભારતના રાજ્યોમાં પણ હવે શિયાળાની વિદાય સાથે ઉનાળાના પગરવ સંભળાઈ રહ્યા છે.
પહાડોમાં બરફની વર્ષા, મેદાનોમાં તપારો
હવામાન વિભાગના જણાવ્યા મુજબ, એક નબળું પશ્ચિમી વિક્ષેપ (Western Disturbance) અત્યારે સક્રિય છે, જ્યારે ૬ માર્ચથી વધુ એક નવી સિસ્ટમ હિમાલયના પટ્ટાને અસર કરશે. આ કારણે ૪ થી ૯ માર્ચ દરમિયાન જમ્મુ-કાશ્મીર અને લદ્દાખમાં હળવો વરસાદ અને બરફ પડી શકે છે. હિમાચલ પ્રદેશમાં ૭ માર્ચથી અને ઉત્તરાખંડમાં ૮-૯ માર્ચે હિમવર્ષા થવાની શક્યતા છે. આ પહાડી હિલચાલને કારણે મેદાની વિસ્તારોમાં પવનની ગતિમાં ફેરફાર જોવા મળશે.
સિક્કિમમાં ધુમ્મસ અને દક્ષિણમાં ગરમી
પૂર્વોત્તર ભારતની વાત કરીએ તો સિક્કિમના કેટલાક ભાગોમાં વહેલી સવારે ગાઢ ધુમ્મસ છવાયેલું રહેશે. બીજી તરફ, દક્ષિણ ભારતમાં તમિલનાડુ જેવા રાજ્યોમાં આગામી બે દિવસ તાપમાન સ્થિર રહ્યા બાદ ૨ ડિગ્રી જેટલો વધારો નોંધાશે. એકંદરે, આ આખું અઠવાડિયું દેશના મેદાની વિસ્તારો માટે મોસમી રીતે ગરમ રહેવાનું છે, તેથી લોકોએ અત્યારથી જ આકરી ગરમીનો સામનો કરવા તૈયાર રહેવું પડશે.