નવી દિલ્હી/તેહરાન: મધ્ય પૂર્વમાં લોહીલુહાણ જંગ હવે તેના સૌથી વિનાશક તબક્કામાં પહોંચી ગયો છે. ઈરાનના સુપ્રીમ લીડર આયાતુલ્લાહ અલી ખામેનીના ઈઝરાયેલી હુમલામાં થયેલા મોત બાદ તેમના પુત્ર મોજતબા ખામેનીને નવા સુપ્રીમ લીડર તરીકે નિયુક્ત કરવામાં આવ્યા છે, પરંતુ તેમની સત્તાનો સૂર્યોદય થાય તે પહેલા જ ઈઝરાયેલે તેમને 'ડેથ વોરંટ' જેવી ચેતવણી આપી દીધી છે. ઈઝરાયેલના સંરક્ષણ મંત્રી ઈઝરાયેલ કાત્ઝે સોશિયલ મીડિયા પ્લેટફોર્મ X પર એક અત્યંત કડક પોસ્ટ શેર કરતા જણાવ્યું છે કે, ઈરાનના સર્વોચ્ચ નેતા તરીકે નિયુક્ત થયેલી કોઈપણ વ્યક્તિ ઈઝરાયેલ માટે "નાબૂદીનું લક્ષ્ય" (Target for Elimination) હશે. કાત્ઝે સ્પષ્ટ શબ્દોમાં લખ્યું છે કે જે કોઈ પણ ઈરાની આતંકવાદી શાસનનું નેતૃત્વ કરશે અને ઈઝરાયેલ કે મુક્ત વિશ્વને ધમકી આપશે, તેને ઈઝરાયેલ જડબાતોડ જવાબ આપશે.

યુદ્ધના મેદાનમાં ઈઝરાયેલે માત્ર શબ્દોથી નહીં પણ શસ્ત્રોથી પણ આક્રમકતા બતાવી છે. શનિવારે આયાતુલ્લાહ ખામેનીની હત્યા બાદ, ઈઝરાયેલી વાયુસેનાએ ઈરાનની તે સર્વોચ્ચ સંસ્થા 'એસેમ્બલી ઓફ એક્સપર્ટ્સ'ની ઈમારતને નિશાન બનાવી હતી જે નવા નેતાની પસંદગી માટે જવાબદાર છે. અમેરિકી રાષ્ટ્રપતિ ડોનાલ્ડ ટ્રમ્પે પણ પુષ્ટિ કરી છે કે તાજેતરના હવાઈ હુમલાઓમાં ઈરાની નેતાઓના બીજા મોટા જૂથને સફળતાપૂર્વક ટાર્ગેટ કરવામાં આવ્યું છે. સીએનએનના અહેવાલ મુજબ, તેહરાનમાં આવેલા આ કમાન્ડ સેન્ટર પર થયેલા હુમલાએ ઈરાની તંત્રને હચમચાવી દીધું છે, જોકે ઈરાની મીડિયા દાવો કરી રહ્યું છે કે બોમ્બમારા પૂર્વે જ ઈમારત ખાલી કરાવી દેવામાં આવી હતી. આ હુમલાઓએ સ્પષ્ટ કરી દીધું છે કે ઈઝરાયેલ હવે ઈરાનના નેતૃત્વના મૂળિયા ઉખેડવા માટે કટિબદ્ધ છે.

આ ભયાનક સંઘર્ષની વચ્ચે મધ્ય પૂર્વમાં વસતા વિદેશી નાગરિકો માટે સ્થિતિ અત્યંત દયાજનક બની છે. અમેરિકાએ પ્રાદેશિક અસ્થિરતાને જોતા ત્રણ દેશોમાં પોતાના દૂતાવાસોના તાળા મારી દીધા છે અને તમામ અમેરિકન નાગરિકોને તાત્કાલિક અસરથી આ પ્રદેશ છોડી દેવા વિનંતી કરી છે. અંદાજે ૧,૫૦૦થી વધુ અમેરિકનોએ રેસ્ક્યુ માટે અરજી કરી છે, જેમના માટે ચાર્ટર ફ્લાઇટ્સ અને લશ્કરી વિમાનોની વ્યવસ્થા કરવામાં આવી રહી છે. જોકે, ઈઝરાયેલમાં ફસાયેલા અમેરિકનો માટે વિકલ્પો સીમિત છે, કારણ કે ત્યાંના યુએસ રાજદૂત માઈક હુકાબીએ સ્પષ્ટ કર્યું છે કે દૂતાવાસ જમીની સ્તરે કોઈ સહાય આપી શકશે નહીં. રાષ્ટ્રપતિ ટ્રમ્પના સ્વીકાર મુજબ, હુમલા પૂર્વે કોઈ પૂર્વ-આયોજિત સ્થળાંતર યોજના ન હોવાથી અત્યારે લોજિસ્ટિકલ સુનામી જેવી સ્થિતિ સર્જાઈ છે.