દોહા/તેહરાન: મધ્ય પૂર્વમાં ચાલી રહેલો સંઘર્ષ હવે અત્યંત ખતરનાક વળાંક પર પહોંચી ગયો છે. ઈરાને અમેરિકાની 'આકાશી આંખ' ગણાતા અને મિસાઈલ લોન્ચિંગની પૂર્વ ચેતવણી આપતા અત્યંત આધુનિક AN/FPS-132 રડાર સિસ્ટમને નિશાન બનાવીને અમેરિકી સૈન્ય શક્તિને જબરદસ્ત પડકાર ફેંક્યો છે. કતારમાં સ્થિત આ રડાર પર થયેલા હુમલાની પુષ્ટિ સેટેલાઈટ તસવીરો દ્વારા થતા રક્ષણ નિષ્ણાતોમાં ખળભળાટ મચી ગયો છે.
સસ્તા ડ્રોનનો કરિશ્મા, મોંઘી સિસ્ટમ પર ભારી
આ હુમલાની સૌથી ચોંકાવનારી બાબત એ છે કે ઈરાને અબજો ડોલરની કિંમતની આ સિસ્ટમને તોડવા માટે અત્યંત સસ્તા **'શાહેદ ડ્રોન'**નો ઉપયોગ કર્યો હતો. જે રડાર 5000 કિલોમીટર દૂરથી દુશ્મનની હિલચાલ પકડી શકતું હતું, તે પોતાની રક્ષા કરવામાં નિષ્ફળ રહ્યું છે. આ હુમલાથી અમેરિકાને અંદાજે ₹9000 કરોડ ($1.1 Billion) નું આર્થિક નુકસાન થયું છે અને વ્યૂહાત્મક રીતે મધ્ય-પૂર્વમાં અમેરિકાની મિસાઈલ ટ્રેકિંગ ક્ષમતા ખોરવાઈ ગઈ છે.
ઓપરેશન 'ટ્રુ પ્રોમિસ 4'
ઈરાનના રિવોલ્યુશનરી ગાર્ડ (IRGC) એ આ હુમલાને 'ઓપરેશન ટ્રુ પ્રોમિસ 4' નામ આપ્યું છે. ઈરાનનો દાવો છે કે આ હુમલો અમેરિકા અને ઈઝરાયેલની સતત વધી રહેલી આક્રમકતાનો જડબાતોડ જવાબ છે. કતારના સંરક્ષણ મંત્રાલયના જણાવ્યા અનુસાર, આ હુમલામાં 8 લોકો ઘાયલ થયા છે અને રડાર સાઈટને વ્યાપક નુકસાન પહોંચ્યું છે.
શા માટે આ રડાર મહત્વનું હતું?
આ રડાર અમેરિકાના ગ્લોબલ મિસાઈલ વોર્નિંગ નેટવર્કની મુખ્ય કડી હતું. તે ઈરાન તરફથી આવતી કોઈપણ બેલિસ્ટિક મિસાઈલને સેકન્ડોમાં ટ્રેક કરીને સાઉદી અરેબિયા અને UAE જેવા સહયોગી દેશોને એલર્ટ કરતું હતું. હવે આ સિસ્ટમ ખોરવાતા સમગ્ર મધ્ય-પૂર્વમાં અમેરિકા અને તેના મિત્ર દેશો પર મિસાઈલ હુમલાનું જોખમ વધી ગયું છે.