પેરિસ/દુબઈ: પશ્ચિમ એશિયામાં ઈરાન,  ઈઝરાયેલ અને અમેરિકા વચ્ચે ચાલી રહેલું સૈન્ય સંઘર્ષ હવે વૈશ્વિક મહાયુદ્ધના ભયાનક વળાંક પર પહોંચી ગયું છે. ફ્રાન્સના રાષ્ટ્રપતિ ઇમેન્યુઅલ મેક્રોને અત્યંત વ્યૂહાત્મક નિર્ણય લેતા ફ્રાન્સના એકમાત્ર પરમાણુ સંચાલિત વિમાનવાહક જહાજ 'ચાર્લ્સ ડી ગૌલ'ને બાલ્ટિક સમુદ્રથી તાત્કાલિક ભૂમધ્ય સમુદ્ર તરફ રવાના થવાનો આદેશ આપ્યો છે. આ યુદ્ધ જહાજ તેની સાથે રાફેલ ફાઇટર જેટ્સની આખી એર વિંગ અને અનેક એસ્કોર્ટ ફ્રિગેટ્સ લઈને જઈ રહ્યું છે. મેક્રોને ફ્રેન્ચ ટેલિવિઝન પર આપેલા ભાષણમાં સ્પષ્ટ કર્યું છે કે, સાયપ્રસમાં બ્રિટિશ એરબેઝ પર થયેલા હુમલા અને સાથી દેશોના હિતો પર વધી રહેલા જોખમને જોતા ફ્રાન્સ હવે ચૂપ બેસી શકે તેમ નથી. આ પગલાં સાથે ફ્રાન્સ હવે સીધું જ મધ્ય પૂર્વના રણમેદાનમાં કૂદી પડ્યું છે.

UAEમાં સ્થિત ફ્રેન્ચ મિલિટરી બેઝ પર ઈરાની ડ્રોન હુમલા બાદ ફ્રાન્સે પોતાની લશ્કરી કાર્યવાહી તેજ કરી દીધી છે. અબુ ધાબી નજીકના અલ-ધફરા એરબેઝ પર તૈનાત ફ્રેન્ચ રાફેલ ફાઇટર જેટ્સે સફળતાપૂર્વક ઈરાની ડ્રોનને હવામાં જ નિષ્ક્રિય કરી દીધા છે. ફ્રાન્સના વિદેશ પ્રધાન જીન-નોએલ બેરોટે જણાવ્યું છે કે UAEમાં સેંકડો ફ્રેન્ચ નૌકાદળ અને હવાઈ દળના જવાનો ૨૪ કલાક એલર્ટ મોડ પર છે. રવિવારે ફ્રેન્ચ બેઝના હેંગર પર થયેલા ડ્રોન હુમલા બાદ ફ્રાન્સે તેની એર ડિફેન્સ રડાર સિસ્ટમ્સને વધુ મજબૂત બનાવી છે. ફ્રાન્સના આ આક્રમક વલણથી એ સ્પષ્ટ છે કે તે ઈરાન સામે પોતાના સાથી દેશો—UAE, કતાર, કુવૈત અને જોર્ડન—ના રક્ષણ માટે કોઈ પણ હદ સુધી જવા તૈયાર છે.

આ સંઘર્ષની જડમાં શનિવારે ઈઝરાયેલ અને અમેરિકા દ્વારા ઈરાન પર કરવામાં આવેલા ભીષણ હુમલા અને ઈરાની સુપ્રીમ લીડર અલી ખામેનેઈની હત્યા હોવાનું મનાય છે. આ ઘટના બાદ ઈરાને વળતો પ્રહાર કરતા ગલ્ફ દેશોમાં આવેલા પશ્ચિમી સૈન્ય મથકો પર ડ્રોન અને મિસાઈલનો મારો ચલાવ્યો છે. રાષ્ટ્રપતિ મેક્રોને ચિંતા વ્યક્ત કરી છે કે હોર્મુઝની સામુદ્રધુની અને લાલ સમુદ્રના માર્ગો પર સર્જાયેલું જોખમ વૈશ્વિક અર્થતંત્રને પાયમાલ કરી શકે છે. તેલ અને ગેસના ભાવો જે રીતે ભડકે બળી રહ્યા છે, તેનાથી આંતરરાષ્ટ્રીય વેપાર ઠપ્પ થવાની આશંકા છે. આથી ફ્રાન્સ હવે સુરક્ષિત દરિયાઈ ટ્રાફિક સુનિશ્ચિત કરવા માટે એક મોટા આંતરરાષ્ટ્રીય ગઠબંધનનું નેતૃત્વ કરી રહ્યું છે.

રાજકીય વિશ્લેષકો માને છે કે ફ્રાન્સ જેવી પરમાણુ શક્તિનું આ રીતે સીધું યુદ્ધમાં ઝંપલાવવું વિનાશક સાબિત થઈ શકે છે. યુરોપિયન દેશો અત્યાર સુધી રાજદ્વારી સમાધાનની વાત કરતા હતા, પરંતુ હવે તેઓ સૈન્ય શક્તિ પ્રદર્શન પર ઉતરી આવ્યા છે. ઈરાનના હુમલાઓ હવે ખાડી દેશોની સરહદો ઓળંગીને યુરોપિયન ઠેકાણાઓ સુધી પહોંચી ગયા છે, જે સૂચવે છે કે આ સંઘર્ષ હવે પ્રાદેશિક રહ્યો નથી. 'ચાર્લ્સ ડી ગૌલ'ની હાજરી ભૂમધ્ય સમુદ્રમાં શક્તિ સંતુલન બદલી નાખશે, પરંતુ તેની સાથે જ રશિયા અને ચીન જેવા દેશોના વલણ પર પણ દુનિયાની નજર રહેશે. જો આ સ્થિતિ વણસશે, તો દાયકાઓ પછી માનવજાત ફરી એકવાર મહાયુદ્ધના કાળા ઓછાયા નીચે જીવવા મજબૂર બનશે.