નવી દિલ્હી: ઈરાન-ઈઝરાયલ વચ્ચેના ભીષણ યુદ્ધને કારણે પશ્ચિમ એશિયાનું આકાશ અત્યારે જોખમી બન્યું છે, જેના કારણે સેંકડો ભારતીય મુસાફરો વિદેશી ધરતી પર અટવાયા છે. મુસાફરોની આ લાચારી અને મૂંઝવણને દૂર કરવા માટે ભારત સરકારના નાગરિક ઉડ્ડયન મંત્રાલયે (MoCA) કમર કસી છે. મંત્રાલયે ખાસ પેસેન્જર સહાય નિયંત્રણ રૂમ (PACR) સક્રિય કર્યો છે, જે ચોવીસ કલાક કાર્યરત રહીને મુસાફરોની સમસ્યાઓનું નિવારણ કરી રહ્યો છે.
એક્શન મોડમાં કંટ્રોલ રૂમ: ફરિયાદોનું રીઅલ-ટાઇમ નિરાકરણ
નાગરિક ઉડ્ડયન મંત્રાલયના જણાવ્યા અનુસાર, આ કંટ્રોલ રૂમ માત્ર ફરિયાદો નોંધતો નથી પરંતુ એરલાઇન્સ અને એરપોર્ટ ઓપરેટરો સાથે સીધું સંકલન કરીને તેનો ઉકેલ પણ લાવે છે. અત્યાર સુધીમાં 411 થી વધુ મુસાફરોની ફરિયાદો સફળતાપૂર્વક ઉકેલવામાં આવી છે. ખાસ કરીને જે મુસાફરોની ફ્લાઇટ્સ રદ થઈ છે અથવા જેમને રૂટ ડાયવર્ઝનને કારણે મુશ્કેલી પડી રહી છે, તેમને આ કંટ્રોલ રૂમ દ્વારા માર્ગદર્શન અને સહાય પૂરી પાડવામાં આવી રહી છે.
ક્યાં અને કેવી રીતે મેળવવી મદદ?
જો તમે અથવા તમારા કોઈ સંબંધી પશ્ચિમ એશિયાની ફ્લાઇટ કેન્સલેશનને કારણે મુશ્કેલીમાં છો, તો તમે નીચેના માધ્યમો દ્વારા ભારત સરકારનો સંપર્ક કરી શકો છો:
•    સમર્પિત હેલ્પલાઇન: 011-24604283 અને 011-24632987 પર સીધો કોલ કરી શકાય છે.
•    એરસેવા (AirSewa) પોર્ટલ: ઓનલાઇન ફરિયાદ નોંધાવવા માટે આ સત્તાવાર પ્લેટફોર્મનો ઉપયોગ કરો.
•    સોશિયલ મીડિયા: મંત્રાલયના સત્તાવાર હેન્ડલ્સ પર ટેગ કરીને મુસાફરો પોતાની સમસ્યા જણાવી રહ્યા છે.
દૂતાવાસો સાથે સંકલન
મંત્રાલય માત્ર દિલ્હીથી જ નહીં, પરંતુ અસરગ્રસ્ત દેશોમાં આવેલા ભારતીય દૂતાવાસો સાથે પણ સતત સંપર્કમાં છે. એરપોર્ટ પર ફસાયેલા ભારતીયોને દૂતાવાસ દ્વારા જારી કરાયેલા હેલ્પલાઇન નંબરો પહોંચાડવામાં આવી રહ્યા છે જેથી તેમને સ્થાનિક સ્તરે રહેવા-જમવાની કે અન્ય કાનૂની મદદ મળી રહે.
પશ્ચિમ એશિયામાં બદલાતી સુરક્ષા સ્થિતિને જોતા ભારતીય કેરિયર્સ સતત તેમના સમયપત્રકમાં ફેરફાર કરી રહ્યા છે, ત્યારે મંત્રાલયનો આ હસ્તક્ષેપ સામાન્ય મુસાફરો માટે આશીર્વાદરૂપ સાબિત થઈ રહ્યો છે.