દુબઈ, તા.૦૨: ઈરાન અને ઈઝરાયલ વચ્ચે ચાલી રહેલા ભીષણ યુદ્ધની માઠી અસર હવે વૈશ્વિક પરિવહન પર પણ પડી રહી છે. મધ્ય પૂર્વના અનેક દેશો દ્વારા પોતાની એરસ્પેસ (હવાઈ સરહદ) બંધ કરી દેવામાં આવતા દુનિયાની દિગ્ગજ એરલાઇન અમીરાતે (Emirates) મંગળવાર, 3 માર્ચના રોજ બપોરે 3:00 વાગ્યા સુધી દુબઈ આવતી અને ત્યાંથી જતી તમામ ફ્લાઇટ્સ સ્થગિત કરવાની જાહેરાત કરી છે. આ નિર્ણયને કારણે હજારો ભારતીય પ્રવાસીઓ સહિત લાખો વૈશ્વિક મુસાફરો એરપોર્ટ પર અટવાયા છે.
સલામતી સર્વોપરી: અમીરાતનું નિવેદન
અમીરાતે સ્પષ્ટતા કરી છે કે પ્રાદેશિક તણાવને કારણે સ્થિતિ અત્યંત ગતિશીલ છે અને મુસાફરો તેમજ ક્રૂ મેમ્બર્સની સુરક્ષા સાથે કોઈ બાંધછોડ કરી શકાય તેમ નથી. એરલાઇન સતત પરિસ્થિતિનું મૂલ્યાંકન કરી રહી છે. માત્ર ફ્લાઇટ્સ જ નહીં, પણ દુબઈ શહેરમાં આવેલા તમામ 'સિટી ચેક-ઇન' પોઈન્ટ્સ પણ આગામી સૂચના સુધી બંધ કરી દેવામાં આવ્યા છે, જેથી એરપોર્ટ પર ભીડને નિયંત્રિત કરી શકાય.
મુસાફરો માટે શું છે સુવિધા?
જો તમારી ફ્લાઇટ રદ થઈ છે, તો ચિંતા કરવાની જરૂર નથી. એરલાઇને મુસાફરોને નીચે મુજબના વિકલ્પો આપ્યા છે:
•    ફ્રી રિબુકિંગ: મુસાફરો 20 માર્ચ સુધીની કોઈપણ અન્ય ફ્લાઇટમાં વિનામૂલ્યે રિબુકિંગ કરાવી શકે છે.
•    ફુલ રિફંડ: જે મુસાફરો મુસાફરી રદ કરવા માંગે છે, તેઓ અમીરાતની વેબસાઇટ પર રિફંડ ફોર્મ ભરીને પૂરેપૂરા પૈસા પાછા મેળવી શકે છે.
•    ટ્રાવેલ એજન્ટ: જો તમે એજન્ટ મારફતે ટિકિટ બુક કરાવી હોય, તો તમારે સીધો તેમનો જ સંપર્ક કરવાનો રહેશે.
એરપોર્ટ જતાં પહેલાં આટલું ચોક્કસ કરો
અમીરાતે તમામ મુસાફરોને અપીલ કરી છે કે તેઓ એરપોર્ટ જવા માટે ઘરની બહાર નીકળે તે પહેલાં વેબસાઇટ પર પોતાની ફ્લાઇટનું સ્ટેટસ (Flight Status) અચૂક તપાસે. સાથે જ 'મેનેજ યોર બુકિંગ' વિભાગમાં જઈને પોતાની સંપર્ક વિગતો અપડેટ કરે જેથી ફ્લાઇટમાં થતા કોઈ પણ ફેરફારની માહિતી સીધી ઇમેઇલ કે મોબાઈલ પર મળી શકે.
દિલ્હી, મુંબઈ અને અમદાવાદ જેવા મુખ્ય ભારતીય શહેરોથી દુબઈ જતી ફ્લાઇટ્સ પર પણ તેની સીધી અસર પડી છે. મુસાફરોની અસુવિધા બદલ એરલાઇને માફી માંગી છે અને જણાવ્યું છે કે તેઓ સંબંધિત સત્તાવાળાઓ સાથે સતત સંપર્કમાં છે.