ઇઝરાયલે તેહરાનમાં ગાંધી હોસ્પિટલ પર હુમલો કર્યોઃ અનેક વોર્ડ ખંડેર
ઇઝરાયલે ઇરાનમાં ગાંધી હોસ્પિટલને નિશાન બનાવી : હુમલામાં અનેક તબીબી સાધનોનો નાશ થયો. હુમલા સમયે હોસ્પિટલમાં સેંકડો દર્દીઓની સારવાર ચાલી રહી હતી
તેહરાન,તા.૨: અમેરિકા, ઇઝરાયલ અને ઇરાન વચ્ચે યુદ્ધ ચાલુ છે. આ દરમિયાન, ઇઝરાયલી વાયુસેનાએ ઇરાનની રાજધાની તેહરાનમાં ગાંધી હોસ્પિટલને નિશાન બનાવી. ઇઝરાયલે હોસ્પિટલ પર અનેક મિસાઇલો છોડ્યા. આ હુમલાથી હોસ્પિટલની ઇમારતને નોંધપાત્ર નુકસાન થયું, જેના કારણે અનેક વોર્ડ ખંડેરમાં ફેરવાઈ ગયા. આ ઘટનાના વીડિયો સોશિયલ મીડિયા પર વાયરલ થઈ રહ્યા છે. આ વીડિયોમાં, હોસ્પિટલનો સ્ટાફ દર્દીઓને અન્ય હોસ્પિટલોમાં ખસેડતો જોવા મળી રહ્યો છે.
જોકે, હોસ્પિટલમાં ઘાયલોની સંખ્યા જાહેર કરવામાં આવી નથી. ઇરાને ફક્ત એટલું જ કહ્યું છે કે ઇઝરાયલે શનિવારે હોસ્પિટલને નિશાન બનાવી હતી. આ પછી, દર્દીઓને સ્થળાંતરિત કરવામાં આવ્યા. હોસ્પિટલને સંપૂર્ણપણે ખાલી કરાવવામાં આવી છે. બધા દર્દીઓને સલામત સ્થળે ખસેડવામાં આવ્યા છે. દર્દીઓની જરૂરિયાત મુજબ સાધનો પણ પૂરા પાડવામાં આવ્યા છે. મીડિયા રિપોર્ટ્સ અનુસાર, ગાંધી હોસ્પિટલ ઉપરાંત અન્ય હોસ્પિટલોને પણ નિશાન બનાવવામાં આવ્યા હતા.
મીડિયા રિપોર્ટ્સ અનુસાર, ઇઝરાયેલી વાયુસેનાએ ગાંધી હોસ્પિટલના વિવિધ ભાગો પર મિસાઇલો છોડ્યા હતા, જેના કારણે આગ લાગી હતી અને અસંખ્ય તબીબી સાધનો નાશ પામ્યા હતા. હુમલા સમયે, સેંકડો દર્દીઓની સારવાર ચાલી રહી હતી. ત્યારબાદ હોસ્પિટલમાં અરાજકતા ફેલાઈ ગઈ. હોસ્પિટલના સ્ટાફ અને સુરક્ષા દળોએ તાત્કાલિક બચાવ કામગીરી શરૂ કરી હતી. ઘાયલોને તાત્કાલિક સ્ટ્રેચર પર સારવાર માટે લઈ જવામાં આવ્યા હતા.
આ ઇઝરાયેલી હુમલામાં ઘણા દર્દીઓ, એટેન્ડન્ટ્સ અને સ્ટાફ ઘાયલ થયા હોવાનું જાણવા મળે છે. હુમલા પછી વાયરલ થયેલા વીડિયોમાં નર્સોનું એક જૂથ નવજાત બાળકોને બીજી જગ્યાએ ખસેડતું જોવા મળે છે. ઈરાને નાગરિકો અને હોસ્પિટલ પરના હુમલાઓને યુદ્ધ ગુનો ગણાવ્યો છે. ગાંધી હોસ્પિટલને માત્ર ઈરાનમાં જ નહીં પરંતુ એશિયામાં પણ સૌથી પ્રખ્યાત તબીબી કેન્દ્રોમાંનું એક માનવામાં આવે છે.
ગાંધી હોસ્પિટલ પરના હુમલામાં મોટી સંખ્યામાં જાનહાનિના અહેવાલો છે. જોકે સત્તાવાર આંકડા હજુ સુધી જાહેર કરવામાં આવ્યા નથી, પરંતુ એવી આશંકા છે કે ઘણા દર્દીઓ અને તબીબી સ્ટાફ કાટમાળ નીચે દટાયેલા છે. સ્થાનિક વહીવટીતંત્રે પણ નોંધપાત્ર નુકસાનની આશંકા વ્યક્ત કરી છે.
શનિવારે, ઇઝરાયલે મધ્ય ઇરાનમાં નાના બાળકો માટેની એક શાળા પર હુમલો કર્યો. અત્યાર સુધીમાં ૧૮૫ લોકો માર્યા ગયા છે, જેમાં મોટાભાગના નાના બાળકો છે. આના કારણે હોસ્પિટલ પરનો હુમલો માનવતાવાદી કટોકટી હોવાના આરોપો લાગ્યા છે.
ઈરાનના તેહરાનમાં સ્થિત ગાંધી હોસ્પિટલને એશિયાના સૌથી પ્રખ્યાત તબીબી કેન્દ્રોમાંનું એક માનવામાં આવે છે. ઈરાની મીડિયાના અહેવાલ મુજબ, ગાંધી હોસ્પિટલ ૨૦૦૮-૨૦૦૯માં સ્થાપિત એક અત્યાધુનિક ખાનગી આરોગ્યસંભાળ કેન્દ્ર છે, જે ૩૨,૦૦૦ ચોરસ મીટરના કેમ્પસમાં સ્થિત છે જેમાં રાષ્ટ્રીય અને આંતરરાષ્ટ્રીય નિષ્ણાતોનો સ્ટાફ છે. તે તેના આરોગ્ય પ્રવાસન આકર્ષણ માટે જાણીતું છે, જેમાં ૧૭ માળની હોસ્પિટલ અને ૨૧ માળની હોટેલ છે, દરેકમાં ૧૦૦ થી વધુ પથારી છે. આ હોસ્પિટલ તમામ પ્રકારની બીમારીઓ ધરાવતા દર્દીઓની સારવાર કરે છે
(10:09 AM IST)
છેલ્લા 8 દિવસમાં સૌથી લોકપ્રિય 
