મેક્સિકો સિટી : મેક્સિકોમાં વસંત વિરામ (Spring Break) ની તૈયારીઓ ચાલી રહી છે ત્યારે જ દેશના સૌથી શક્તિશાળી 'જાલિસ્કો ન્યૂ જનરેશન કાર્ટેલ' ના વડા નેમેસિયો રુબેન ઓસેગ્યુરા સર્વાન્ટેસ ઉર્ફે 'અલ મેન્ચો'ની હત્યા થતા સમગ્ર દેશમાં અશાંતિ ફેલાઈ છે. આ ઘટનાને પગલે પ્રખ્યાત પ્રવાસન સ્થળોએ ગોળીબાર, આગજની અને રસ્તાઓ રોકવાની ઘટનાઓ સામે આવતા પ્રવાસીઓ મૂંઝવણમાં મુકાયા છે કે શું અત્યારે ત્યાં જવું સલામત છે?

હિંસાનો મધપૂડો છંછેડાયો

જાલિસ્કો રાજ્યમાં થયેલી આ અથડામણમાં અત્યાર સુધીમાં ૩૪ શંકાસ્પદ કાર્ટેલ સભ્યો અને ૨૫ નેશનલ ગાર્ડના જવાનોના મોત થયા છે. પ્યુઅર્ટો વલ્લર્ટા અને ગુઆડાલજારા જેવા શહેરોમાં સ્થિતિ એટલી ગંભીર હતી કે અમેરિકી સરકારે તેના નાગરિકો માટે "સ્થળે જ આશ્રય" (Shelter-in-place) લેવાની તાકીદ કરી હતી. જોકે, હાલમાં આ ચેતવણી પાછી ખેંચી લેવામાં આવી છે અને ફ્લાઈટ્સ ધીમે ધીમે સામાન્ય થઈ રહી છે.

પ્રવાસીઓ પર કેટલી અસર?

ભૂતપૂર્વ પેન્ટાગોન અધિકારી કેન્ટ વેબરના જણાવ્યા મુજબ, "મેક્સિકોની મુસાફરી ક્યારેય જોખમમુક્ત હોતી નથી." સામાન્ય રીતે કાર્ટેલ સભ્યો પ્રવાસીઓને નિશાન બનાવતા નથી કારણ કે તેઓ સરકારની વધુ તપાસ ટાળવા માંગે છે. પરંતુ અત્યારે કાર્ટેલના વિભાજનને કારણે અનિશ્ચિતતા વધી છે. રવિવાર અને સોમવારે ઘણા પ્રવાસીઓએ સુપરમાર્કેટમાં આગના વીડિયો પોસ્ટ કર્યા હતા અને હોટલના રૂમમાં ભરાઈ રહેવું પડ્યું હતું.

કયા વિસ્તારો સુરક્ષિત અને કયા જોખમી?

અમેરિકી સ્ટેટ ડિપાર્ટમેન્ટ દ્વારા વિવિધ સ્તરની એડવાઇઝરી જાહેર કરવામાં આવી છે:

• લેવલ ૪ (મુસાફરી ન કરો): સિનાલોઆ, ઝાકાટેકાસ અને તામૌલિપાસ.
• લેવલ ૨ (વધુ સાવધાની રાખો): મેક્સિકો સિટી, બાજા કેલિફોર્નિયા સુર અને લોસ કાબોસ.
• સુરક્ષિત: કેન્કુન, ટુલુમ અને કોઝુમેલ જેવા સ્થળો હજુ પણ સલામત મનાય છે કારણ કે તે હિંસાના મુખ્ય કેન્દ્રથી ઘણા દૂર છે.

મુસાફરો માટે ખાસ ટિપ્સ

જો તમે મેક્સિકો જવાનું વિચારી રહ્યા હોવ, તો નિષ્ણાતોની આ સલાહ ગાંઠે બાંધવા જેવી છે:

૧. સત્તાવાર કેબનો ઉપયોગ: અજાણ્યા લોકોની ટેક્સીમાં બેસવાનું ટાળો અને હોટલના વિશ્વસનીય ટ્રાન્સપોર્ટનો જ ઉપયોગ કરો.

૨. હોટલની બહાર ફરવાનું ઓછું કરો: રિસોર્ટ કે હોટલના સુરક્ષિત વિસ્તારમાં જ રહેવાનો આગ્રહ રાખો.

૩. STEP પ્રોગ્રામ: મુસાફરી કરતા પહેલા સ્માર્ટ ટ્રાવેલર એનરોલમેન્ટ પ્રોગ્રામમાં નોંધણી કરાવો જેથી તાજા અપડેટ્સ મળતા રહે.

૪. વીમો: "કોઈપણ કારણોસર રદ કરો" (Cancel for any reason) વાળી ટ્રાવેલ ઈન્સ્યોરન્સ પોલિસી લો.

મેક્સિકોના રાષ્ટ્રપતિ ક્લાઉડિયા શેનબૌમે ખાતરી આપી છે કે "દેશમાં શાંતિ છે", પરંતુ પ્રવાસીઓએ નીકળતા પહેલા લેટેસ્ટ સમાચાર અને એડવાઇઝરી તપાસવી અત્યંત જરૂરી છે