મુંબઈ :  વૈશ્વિક બજારોમાં ભલે ગમે તેવી અસ્થિરતા હોય, પરંતુ ભારતીય અર્થતંત્રનું એન્જિન અત્યારે ફુલ સ્પીડમાં દોડી રહ્યું છે. દેશની સૌથી મોટી બેંક, સ્ટેટ બેંક ઓફ ઈન્ડિયાના તાજેતરના અહેવાલ મુજબ, ચાલુ નાણાકીય વર્ષ 2026 ના ત્રીજા ક્વાર્ટરમાં ભારતનો જીડીપી વૃદ્ધિ દર 8.1% ના સ્તરે પહોંચી શકે છે. આ આંકડો માત્ર આર્થિક નિષ્ણાતો માટે જ નહીં, પણ સમગ્ર વિશ્વ માટે આશ્ચર્યજનક છે. રિપોર્ટમાં દાવો કરવામાં આવ્યો છે કે મજબૂત સ્થાનિક માંગ અને તમામ ક્ષેત્રોમાં જોવા મળી રહેલી સ્થિર પ્રવૃત્તિને કારણે ભારત વિશ્વમાં સૌથી ઝડપથી વિકસતું મોટું અર્થતંત્ર બની રહેશે.
આ તેજ વૃદ્ધિ પાછળનું મુખ્ય કારણ ગ્રામીણ અને શહેરી વપરાશમાં આવેલો મોટો ઉછાળો છે. તહેવારોની મોસમમાં થયેલો અધધ ખર્ચ અને કૃષિ ક્ષેત્રમાં જોવા મળેલી હકારાત્મકતાને કારણે લોકોની ખરીદશક્તિ વધી છે. ખાસ વાત એ છે કે, ભારત સરકારે હવે જીડીપીની ગણતરી માટેનું 'આધાર વર્ષ'  2011-12 થી બદલીને 2022-23 કરી દીધું છે. આ ફેરફારને કારણે હવે આપણા અર્થતંત્રમાં ડિજિટલ ઈકોનોમી અને સર્વિસ સેક્ટરના વાસ્તવિક યોગદાનને વધુ સચોટ રીતે માપી શકાશે. 27 ફેબ્રુઆરી, 2026 ના રોજ જ્યારે નવા આંકડા જાહેર થશે, ત્યારે તે ભારતીય અર્થતંત્રના નવા અને આધુનિક માળખાનું અસલી પ્રતિબિંબ પાડશે.

માત્ર જીડીપી જ નહીં, પણ ફુગાવા (મોંઘવારી) ની ગણતરીમાં પણ મોટા ફેરફારો કરવામાં આવ્યા છે. ગ્રાહક ભાવ સૂચકાંક  નું બેઝ યર હવે 2024 કરવામાં આવ્યું છે, જેનો અર્થ છે કે હવે મોંઘવારીના આંકડા તમારી વર્તમાન જીવનશૈલી અને ખર્ચની પેટર્નને આધારે નક્કી થશે. આરબીઆઈ  ગવર્નર સંજય મલ્હોત્રાના નેતૃત્વમાં હવે ફુગાવાના લક્ષ્યાંકોની પણ પુનઃ તપાસ કરવામાં આવી રહી છે. એક તરફ દુનિયાના વિકસિત દેશો મંદીના ડરે ફફડી રહ્યા છે, ત્યારે બીજી તરફ ભારત પોતાની આંતરિક તાકાત અને ડિજિટલ ક્રાંતિના જોરે 7.4% વાર્ષિક વૃદ્ધિ તરફ મક્કમ ડગલાં ભરી રહ્યું છે.