પટના, તા. 24: બિહારનું રાજકારણ અત્યારે દફાદારો અને ચોકીદારો પર થયેલા પોલીસ લાઠીચાર્જના મુદ્દે બરાબરનું ગરમાયું છે. આ મુદ્દે આજે બિહાર વિધાનસભામાં એવો હોબાળો થયો કે મુખ્યમંત્રી નીતીશ કુમાર પોતાનો સંયમ ગુમાવી બેઠા હતા. વિપક્ષી સભ્યોના સતત ઘેરાવ અને પ્રશ્નોથી કંટાળીને નીતીશ કુમાર પોતાની બેઠક પરથી ઉભા થઈ ગયા હતા અને આરજેડી (RJD) ના ધારાસભ્યોને ખખડાવી નાખ્યા હતા.
"તમે ક્યારેય કોઈ કામ કર્યું છે?"
વિપક્ષી સભ્યો ભાઈ વીરેન્દ્ર અને કુમાર સર્વજીત તરફ ઈશારો કરતા મુખ્યમંત્રીએ લાલઘૂમ થઈને કહ્યું, "આ બિનજરૂરી દેકારો કરવાનું બંધ કરો. શું તમે ક્યારેય કોઈ કામ કર્યું છે? પાયાવિહોણા આરોપો લગાવવાનું ટાળો. અમે તમારી વાતો સાંભળીએ છીએ, પણ આ વાહિયાત વાતો હવે સહન નહીં થાય." નીતીશ કુમારે કટાક્ષ કરતા ઉમેર્યું હતું કે, જે કંઈ પણ વિકાસના કામો થયા છે તે અમારી સરકારમાં જ થયા છે, તમારી સરકારે કંઈ કર્યું નથી.
 
જીભ લપસી: 202 ને બદલે ગણાવ્યા '2002' ધારાસભ્યો
આ ગરમાગરમ ચર્ચા દરમિયાન એક રમુજી અને આશ્ચર્યજનક ક્ષણ પણ આવી હતી. ગુસ્સામાં બોલી રહેલા નીતીશ કુમારે એનડીએ (NDA) ના ધારાસભ્યોની સંખ્યા વિશે વાત કરતા 202 ને બદલે '2002' બોલી ગયા હતા. આ ભૂલ છતાં તેઓ વિપક્ષ પર પ્રહારો કરવાનું ચાલુ રાખ્યું હતું. તેમની બાજુમાં બેઠેલા સંસદીય બાબતોના મંત્રી વિજય ચૌધરી તેમને શાંત પાડવા અને બેસી જવા માટે વિનંતી કરતા જોવા મળ્યા હતા, પરંતુ મુખ્યમંત્રી માનવા તૈયાર નહોતા.
જૂની યાદો તાજી કરી કટાક્ષ કર્યો
નીતીશ કુમારે આરજેડી સાથેના જૂના ગઠબંધન પર પ્રહાર કરતા કહ્યું, "અમે તમને એક-બે વાર અહીં (સરકારમાં) સાથે લાવવાની ભૂલ કરી હતી, પરંતુ જ્યારે તમે આડા પાટે ચાલવાનું શરૂ કર્યું ત્યારે અમે તમને છોડી દીધા." તેમણે સ્પષ્ટ કર્યું કે સરકાર વિપક્ષની વાતો સાંભળવા તૈયાર છે, પણ ગૃહની ગરિમા જળવાવી જોઈએ.
છેવટે, જ્યારે વિપક્ષી ધારાસભ્યોએ હોબાળો શાંત કર્યો અને પોતાની બેઠક પર ગયા, ત્યારે જ મુખ્યમંત્રી શાંત થયા હતા અને બેઠા હતા. આ ઘટનાએ ફરી એકવાર સાબિત કર્યું છે કે બિહારમાં સત્તાધારી પક્ષ અને વિપક્ષ વચ્ચેની ખાઈ વધુ ઊંડી થઈ રહી છે.